I-JVW ishaye iSundonws Ladies okokuqala kwiHollywoodbets

IPHINDE yakhombisa ukuba yiqembu elizoba yingozi kule sizini i-JVW FC iguqisa iMamelodi Sundonws Ladies ngo 2-1 koweHollywoodbets Super League e-UJ Stadium, eSoweto, ngeSonto. 

I-JVW esefomini enhle selokhu kuqale le sizini ka-2025, ibe yiqembu lokuqala kule sizini ukushaya iSundonwns, kanti bese kungokwesibili kule sizini leli qembu lasePitoli, elingompetha abavikela isicoco lilahla amaphuzu amathathu njengoba emasontweni edlule, ligingqwelwe yiRoyal AM Ladies ngokufika sekudlule isikhathi enkundleni. 

Ngaphandle kokuthi bekungokokuqala i-JVW ishaya iSundowns, leli qembu eliphethwe nguJanine van Wyk owayengukaputeni weBanyana Banyana ngokubambisana noLauren Duncan, okumanje lisendaweni yesithathu kwi-log yeSuper League, alikashaywa emidlalweni engu-11 yakamuva njengoba lagcina ngoMashi 9, ukuthola isibhaxu kuyona iSundowns emzuliswaneni wokuqala wesizini. 

ISundowns yiyona esikhonye kwiSuper League amasizini amahlanu idla izicoco kusukela ekusungulweni kwayo ngesizini ka-2019/2020.

Ngenkathi iSundowns ilahla amaphuzu ishaywa yiJVW, iTS Galaxy Queens esendaweni yesibili kwi-log yeSuper League ihlulekile ukuvala igebe phakathi kwayo neSundowns esaqhwakele idlala ngokulingana ngo 1-1 ne-University of Fort Hare ngoMgqibelo, eDavidson Stadium, e-Alice. 

Njengamanje iGalaxy Queens isendaweni yesibili ngamaphuzu angu-27 ngemuva kweSundowns esaqhwakele ngangu-31.

Ngakolunye uhlangothi, kuqhubekile ukubhinjelwa yizinto kwamaqembu aKwaZulu-Natal kule kwiSuper League njengoba womathathu ebuye elambatha emidlalweni yangempelasonto.

IDurban Ladies ebhedelwa kakhulu yizinto kule sizini, iphinde yathola esinye isibhaxu inenebulwa ngo 4-0 yi-University of Pretoria, eTuks Stadium, ePitoli ngeSonto. 

Kwathi Ezemvelo Women’s FC yashayelwa ekhaya yi-University of JHB ngo 2-1 ngoMgqibelo, eSugar Ray Xulu Stadium, eClermont. 

Kanti iRoyal AM yona iguqiswe yiCity Lads ngo 4-3 eWestbourne Oval Stadium, eGqeberha, ngoMgqibelo. 

IDurban ephethwe nguMary-Jane Sokhela nokuyiyona ehlezi emsileni kwi-log ngamaphuzu amathathu kuphela, ayikanqobi nowodwa umdlalo kwengu-12 esayidlalile kule sizini. 

Kanti ne-AM ayikude kakhulu nasemsileni njengoba isendaweni ka-14 kwi-log, kuthi Ezemvelo engomakoti kulesi sigaba nokuyilona qembu laseKZN elisenza kangcono kule sizini, isendaweni ka-10 kwi-log. 

Imiphumela yeHollywoodbets Super League: 

JVW 2-1 Sundowns; Univ. of Pretoria 4-0 Durban Ladies; Ezemvelo 1-2 UJ Ladies; University of Fort Hare 1-1 TS Galaxy; First Touch 0-1 TUT; City Lads 4-3 Royal AM; Copperbelt 1-0 Richmond