Awase-Afrika nenselelo yokwenyusa izinga koweFifa Club World Cup

UKUQALA koshikishi lomqhudelwano weFifa Club World Cup obhekwe ngabomvu yiningi labathandi bebhola emhlabeni kusho enye inselelo emaqenjini ase-Afrika ekuqhubekeni nokuzabalazela ukumela leli zwekazi ngempumelelo kulo mqhudelwano oyingqayizivele.

Lo mqhudelwano owasungulwa yi-International Federation of Association of Football (Fifa) ngo-2000, udlalelwa ngamaqembu angaphansi kwe-UEFA, CONCACAF, CONMEBOL, AFC, OFC, neCAF.

Uzobanjelwa e-United States of America kusukela kusasa ngokwesigaba samaqoqo kuze kube ngowamanqamu ngoJulayi 13. 

Kulokhu i-Afrika imelwe ngamaqembu amane okuyi-Al Ahly yase-Egypt, Esperance de Tunis yaseTunisia, Wydad Casablanca yaseMorocco neMamelodi Sundowns yaseNingizimu Afrika. 

I-Al Ahly iboshelwe ne-Inter Miami yase-USA, Palmeiras yaseBrazil, neFC Porto yasePortugal kuGroup A.

Ivula ne-Inter Miami engosokhaya negijinyelwa nguLionel Messi wodumo, kusasa ngo-2 ekuseni eHard Rock Stadium, eForida. 

I-Esperance iboshelwe neChelsea yase-England, Flamengo yaseBrazil, neClub Leon yaseMexico kuGroup D.

IWydad iboshelwe ne-Al Ain FC yase-United Arab Emirates, Juventus yase-Italy neManchester City yase-England kuGroup G.

Ivula neMan City engompetha abavikela isicoco ngoLwesithathu ngo-6 ntambama, eLincoln Financial Field.

ISundowns iboshelwe neBorussia Dortmund yaseGermany, Fluminense FC yaseBrazil ne-Ulsan HD FC yaseSouth Korea kuGroup F.

Ivula ne-UIsan ngoLwesithathu phakathi ngo-12 phakathi kwamabili, e-Inter & Co Stadium, eFlorida.

Noma lingakabi bikho izwe lase-Afrika eselike layinqoba iClub World Cup, kodwa i-TP Mazembe yaseDemocratic Republic of Congo neRaja Casablanca yaseMorocco, yiwona maqembu akuleli zwekazi aseke afinyelela kowamanqamu alo mqhudelwano ngo-2010 nango-2013 ngokwehlukana.

Kanti ukufinyelela kowandulela owamanqamu kwe-Al Ahly ngo-2023, eSaudi Arabia, kufanele nakanjani kube kuyisikhuthazi emaqenjini ase-Afrika azobamba iqhaza kowakulo nyaka.

AmaSandawana aguqiswe yiPyramids yase-Egypt kowamanqamu eChampions League muva nje, aya kulo mqhudelwano nethemba lokuvuka azithintithe njengoba esephinda isibili kulo mqhudelwano aphuma kuma-quarterfinal awo ngo-2016, eJapan. 

Leli qembu elicijwa nguMiguel Cardoso ogxekwe kakhulu ngokushiya ngaphandle isethenjwa seqembu nokaputeni, uThemba “Mshishi” Zwane kowamanqamu eChampions League, kubhekwe ngabomvu ukuthi uzosebenzisa maphi amaqhinga kulo mqhudelwano ukuzicubuzela amagabade kubalandeli baleli qembu asebeqala ukushaya amakhala ngaye. 

Ngakolunye uhlangothi i-Al Ahly eya kulo mqhudelwano isiholwa nguJose Riveiro osanda kuthatha izintambo zokuqeqesha kuMarcell Koller, kubhekwe lukhulu kuyona kwazise yilona qembu lase-Afika eligcine ukuhamba ibanga kulo mqhudelwano ngo-2023.

IWydad esanda kuqoka uMohamed Amine Benchachem njengomqeqeshi omusha kulandela ukukhomba indlela, uRhulani Mokwena, ibophele isihlabani saseMzansi, uThembinkosi “Nyoso” Lorch owenza ezibukwayo kuleli qembu kule sizini. 

Ngesifanayo nakwi-Esperance nayo esanda kuqoka umqeqeshi omusha, uMaher Kanzari, njengoba nayo ibophele umdlali wakuleli, u-Elisa Mokwana. 

Imidlalo yokuvula yesigaba samaqoqo yeFifa Club World Cup: 

Kusasa: 

Al Ahly v Inter Miami, 2am; Bayern Munich v Auckland City, 6pm; PSG v Atletico Madrid, 9pm 

NgoMsombuluko: 

Palmeiras v Porto,12am, Botafogo v Seattle Sounders, 4am; Chelsea v Leon 

NgoLwesibli: 

Boca Juniors v Benfica, 12am; Flamengo v ES Tunis, 3am; Fluminense v Borussia Dortmund, 6pm; River Plate v Urawa Reds, 9pm 

NgoLwesithathu: 

Ulsan v Mamelodi Sundowns, 12, am; Monterrey v Inter Milan, 3am; Man City v Wydad AC, 6pm; Real Madrid v Al-Hilal, 9pm 

NgoLwesine: 

Pachuca v RB Salzburg, 12am; Al Ain v Juventus, 3am; Palmeiras v Al Ahly, 6pm; Inter Miami v Porto, 9pm