Ukuhlukunyezwa kwabesifazane kukhuthaze oweComrades wadlubha okuhlukile

UKUDLANGA kwezigameko zokuhlukunyezwa nokubulawa kwabantu besifazane eNingizimu Afrika, kuholele ekutheni umgijimi wesifazane wase-Eastern Cape, athathe isinqumo sokugijima egqoke impahla yokubhukuda sokubhukuda (swimming costume) emjahweni weComrades Marathon ogijinywe emasontweni amabili edlule.  

UFundiswa Ngxishe (42) odabuka eMthatha, e-Eastern Cape ogijimela iChillie Runners Club, ubephakathi kwabagijimi abangu-22 000 abebebambe iqhaza kwiComrades yebanga lika-89.98km, kusukwa eMgungundlovu kuphelelwa ePeople's Park, eThekwini.

Engxoxwenii ekhethekile neSolezwe, uNgxishe ogijimela ukuzigcina engumqemane, ukubeke kwacaca ukuthi inhloso yokugijima kwakhe egqoke ngale ndlela ethatha amehlo yingoba eqwashisa ngesihlava sokuhlukunyezwa kwabesifazane. 

“Inhloso yami ngokugijima ngigqoke i-swimming costume, yingoba ngiqwashisa ngesihlava sokuhlukunyezwa kwabesifazane nezingane. Ngiveza ukuthi le nkolelo yokuthi abantu besifazane badlwengulwa ngoba begqoka izinto ezimfishane eziveza amathanga, iyinto engekho okungafanele neze igqugquzelwe emiphakathini yethu. Ngakho ukugqoka kwami sakuba nqunu akusho ukuthi ngiheha abesilisa ukuthi balale nami kodwa ngikhombisa ukuthi njengomuntu wesifazane kumele ngigqoke ngendlela engiyithandayo ngaphandle kokwesaba ukuthi ngizonukubezwa. Nangonyaka odlule ngangigqoke ngendlela efanayo kodwa khona ngangigijima ngigqoke iphenti,” kusho uNgxishe, oqede umjaho ngesikhathi esingu-10:19."

Uthe uthole ukwesekwa okukhulu kubantu emgwaqweni kusukela eMgungundlovu kuze kuyofika eThekwini. Uqhube wathi abekho abantu (besilisa) abamhluphile noma bakhuluma amazwi anohlevana.

Le ntokazi ezinze e-East London, e-Eastern Cape, ngokomsebenzi engunina womfana oneminyaka engu-17, isigijime iComrades amahlandla ayisikhombisa yayiqeda kusukela ngo-2017 iqala ukugijima lo mjaho.

“Ngingumuntu onomzimba kusukela ebuncaneni bami, ukugijima kuyangisiza kakhulu ekwehliseni isisindo somzimba wami, ngakho kuyangijabulisa kakhulu ukugijima ngoba kungigcina ngiphile kahle ngiwumqemane. Ngiyakhuthaza ukuthi nabanye abesifazane bakukhuthalele ukuzivocavoca ukulwa nezifo eziningi noma kungasekona ukugijima iComrades kuphela, ngoba miningi imijaho abangayigijima emifishane yo-20km no-10km njalo njalo,” kuqhuba uNgxishe oyinxusa lomjaho iLemo Mall Mangaung Marathon, eFree State.

Ngaphandle kokugijima iComrades, uNgxishe usegijime eminye imijaho ehlukahlukene okubalwa kuyona iTotalsports Two Oceans Marathon, Sanlam Cape Town Marathon  eseKapa, Buffs Marathon ese-East London, Barberton Makhonjwa Mountain Marathon eseMpumalanga, Johannesburg City Marathon, neLemo Mall Mangaung Marathon.