Ugxeka abahleli bomjaho weComrades umndeni womgijimi obelahlekile
UMGIJIIMI weComrades Marathon, uMoria Harding obelahlekile watholakala esesimweni esibucayi waphuthunyiswa esibhedlela ngemuva kokulahleka ephuma ekugijimeni iComrades ngeSonto
Image: COMRADES FACEBOOK
UMNDENI womgijimi weComrades Marathon, uMoria Harding, olahleke ngeSonto watholakala ngoMsombuluko, ugxeke indlela izinto ezihlelwe ngayo ngemuva kwalo mjaho oyichaza njengeyisiphithiphithi nengahlelekile.
UHarding (54) waseKapa ongumgijimi wesifazane obephakathi kwabagijimi abangu-22 000 abebengenele lo mjaho webanga lika-89.98km osukele eCity Hall, eMgungundlovu kwehliwa waphelela ePeople’s Park, eThekwini ngeSonto, utholakale ngoMsombuluko ekuseni engasakwazi ukukhuluma engenwe nangamakhaza eduze kweNational Sea Rescue Institute (NSRI), ePhoyinti, eThekwini kulandela ukulahleka kwakhe ephuma emjahweni.
Ekutholakaleni kwakhe ube esephuthunyiswa esibhedlela ngendiza enophephela emhlabeni, nokuyilapho elulamela khona.
Udadewabo kaHarding, uFiona Baldwin, uthe: “Bekungekho ukuhleleka ekugcineni komjaho. Bekuyisinyokotho nje. Ukube umjaho uphelele e-stadium (enkundleni) angikholwa wukuthi uMoria ubezolahleka,” kusho uBaldwin.
Abagijimi abaningi nabalandeli bezokugijima bavumelane ngazwi linye nokukhathazeka kukaBaldwin, bekhala ngokungalawulwa ngendlela kwabantu abaningi abebekulo mjaho, nokungabi bikho kosizo lwezempilo olwanele endaweni okuphelela kuyo umjaho.
Ngo-2023 lo mjaho weComrades owawugijinywa kwehlilwa kusukwa eMgungundlovu kubhekwe eThekwini, waphelela enkundleni yaseKingsmead. Nakuba iPeople’s Park iseduze kwenkundla iMoses Mabhida Stadium, kodwa ukulungiswa kwale nkundla okuqhubekayo kubukeka kuyikho okuholele ekutheni lo mjaho ungaqedelwa kule nkundla.
NgoMsombuluko emcimbini wokuklonyeliswa kwabagijimi abenze kahle kwiComrades obuseLangeni Hotel, eThekwini, uMqondisi Ngcobo ongusihlalo weComrades Marathon Association, ukuqinisekisile ukuthi uHarding utholakele ngoMsombuluko usesimeni esigculisayo esibhedlela.