USeme akanangcindezi yokuqeqeshwa yingwazi enguyise

UKUBA yindodana yengwazi yomqeqeshi owaziwayo eNingizimu Afrika, akukaze kumfakele   ingcindezi uSikhumbuzo Seme ozobe egijima iComrades Marathon okwehlandla lesine kulo nyaka.

IComrades yanonyaka yebanga lika-89.98km, izogijinywa kwehliwa kusukwa eMgungundlovu kubheke eThekwini, ngeSonto. 

USeme (40) uqeqeshwa nguyise, uMichael “Sponge” Seme ongumqeqeshi owaziwayo kuleli osekhiqize izibabuli zabagijimi okubalwa kuzona uCaster Semenya noStephen Mokoka.

Lo mgijimi ongaphansi kweHollywood Athletics Club, ogijime iComrades okokuqala ngo-2022, ulwela ukungena kwabayishumi bokuqala ngeSonto njengoba kowanyakenye ethathe indawo ka-17, ngo-2023 wathatha indawo ka-11, ngo-2022 wangena kweka-22.

Uza kwiComrades yanonyaka nje ngoJanuwari unqobe umjaho iJohnson Crane Hire Marathon yebanga lika-42km ebiseBenoni, eGoli.

“Njengoba kulo nyaka ngizobe ngiyigijima okwesine iComrades, inhloso yami ukwenza kangcono kakhulu. Kungangijabulisa kakhulu ukungena kwi-top 10. 

Ngizilungiselele kahle ngaphambi kwalo mjaho, akukho lapho engiphazamiseke khona emalungiselelweni ami. Ngakho ngizimisele futhi nginethemba lokwenza kangcono,” kusho uSeme odabuke oSizweni, eNewcastle. 

Ngasohlangothini lokuqeqeshwa nguyise ongumqeqeshi owaziyo osekhiqize abagijimi abanempumelelo, uSeme uyiphikile eyengcindezi. 

“Kusukela ebuncaneni bami ngisakhula, bengiqeqeshwa ngubaba. Angikaze ngiqeqeshwe ngomunye umqeqeshi. 

Ngifunde lukhulu kuyena ngenxa yothando nogqozi analo ngomdlalo wokugijima, nami ngabe sengiba nothando lwalo mdlalo kusukela ekukhuleni kwami kuze kube manje.

“Empeleni akukaze kungifakele ingcindezi ukuqeqeshwa ngubaba phezu kwabagijimi abanempumelelo asebedlule esandleni sakhe ngoba ngiyakuqonda ukuthi wonke umuntu  unesiphiwo sakhe.

Amava akhe kwezokugijima yiwona angisizile, angikhuthaza ekusebenzeni ngokuzimisela ukuze nami ngiphumelele kwezokugijima,” kuqhuba uSeme.

Uthe uyise akamthathi njengomqeqeshi ogxile kwi-track and field kuphela kodwa ungumqeqeshi osabalele namabanga ehlukene nokuvundulula ithalente labagijimi. 

“Mina ngiqale ngigijima i-track and field, ngeza kwi-cross country njengoba manje sengigijima ama-marathon. Kanjalo futhi nabanye abagijimi abaqeqeshayo abanjengoMokoka bagijime amabanga ehlukene, okuyi-track and field, cross country njengoba manje esegijima ama-marathon.”