UMoloi nezinhloso ezintsha ebuyela kwesokuhola i-ASA

UJAMES Moloi ophinde wakhethwa kwesokuba ngumengameli we-Athletics South Africa (ASA) okwesibili, ubeke eqhulwini ukubuyisa uzinzo ekuphathweni kwale nhlangano nokunxenxa abaxhasi. 

UMoloi ubekhuluma ngemuva kokubuyela kwakhe esikhundleni ehlula imbangi yakhe, u-Aleck Skhosana, okhethweni lwezinkani zababili lokuqoka ubuholi obusha bale nhlangano obeluseSouthern Sun Hotel, eGoli, ngoMgqibelo. 

UJohn Mathane ukhethwe njengephini likaMoloi, uKesa Molotsane wakhethwa njengosihlalo omusha we-Athletics Commission, kwathi uJean Verster wabuyela kwesokuba ngusihlalo we-Track and Field Commission. UJames Jacobs ubuyele kwesokuba ngusihlalo we-Cross Country Commission. 

“Ngiyabonga ngokwesekwa engikutholile, kuyinkomba yokuthi siwenze kahle umsebenzi kule minyaka emine singene ebuholini.

Ngiyathembisa ukuthi ngizokwenza okusemandleni ukufukula umdlalo (wezokugijima) ufinyelele ezingeni elingcono kakhulu kunaleli okulo manje, ngilethe eminye imiqhudelwano engaphezulu kwalena esinayo eNingizimu Afrika,” kusho uMoloi. 

“Abaningi abakhethiwe ngabantu abanamava, engifuna ukwakha nabo ibhodi eliyimbumba, nelizobuyisa uzinzo enhlanganweni.”

Uthe uhlose ukunxenxa abaxhasi nokuqhubeka nezinhlelo abeseziqalile, abengakwazanga ukuziqeda ngehlandla lakhe lokuqala. 

“Esikhathini esedlule sinxenxe izinkampani ezahlukene ngenhloso yokuthola uxhaso kuzo, kodwa eziningi zakubeka ngokucacile ukuthi zifuna ukubona uzinzo nemiphumela kuqala.

Njengamanje sesikwazile ukukufeza kokubili ngokwenza kahle kwabagijimi bethu, ngakho-ke sesihlela ukuphinda sibuyele kulezo zinkampani ukuyoxoxa nazo futhi. Sizimisele ngokwakha ibhodi elibumbene elizobeka phambili izidingo zabagijimi,” kuqhuba uMoloi owathatha izintambo zokwengamela i-ASA ngo-2021 kuSkhosana. 

Uthembise ukuyisukumela eyokuqokwa kwesikhulu esiphezulu sale nhlangano esisebenza ngokugcwele.

“Leyo iseqhulwini. Uma nje sesihlangene nebhodi, nakanjani sizoyidingida leyo. Akufanele sithathe isikhathi ekuqokeni i-CEO eqashwe ngokugcwele, ukuze sikwazi ukuqhubeka nomsebenzi  silethe nozinzo enhlanganweni.”

UMoloi usho kanjena nje, i-ASA ayikabi naso isikhulu esiphezulu esisebenza ngokugcwele kulandela ukuxoshwa kukaFrik Vermaak owayephethe lesi sikhundla owaxoshwa ngo-2012. 

UTerrence Magogodela osabambe lesi sikhundla wanukeka emacaleni athinta uxhasomali kwiNational Lottery.

UMoloi ukuvezile ukukhathazeka kwakhe ngokuhoxa kwabanye abebengenele ukhetho lwe-ASA.

Ubuholi obumele iCentral Gauteng Athletics (CGA) nobebumele i-Athletics Free State (AFS), bebungeyona ingxenye yokhetho lwe-ASA.

“Inhliziyo yami ibuhlungu ngokuthi abanye balabo ababesohlwini lwabazongenela ukhetho abalitholanga ithuba lokuza bazofaka amavoti abo, okungezinye zezinto ezenzekayo empilweni lezo. Kodwa ngiyathembisa ukuthi nebhodi lami elisha sizoqinisekisa ukuthi kungaphinde kwenzeke lokhu. Sifuna izinhlaka zobuholi besifundazwe ziqine nomthethosisekelo ulandelwe,'' kusho uMoloi.