OwaseMpendle ufuna ukushintsha ukwenza kwiComrades
ULINDELANI Mjwara ozobe egijima iComrades Marathon okwehlandla lesibili ngeSonto, kusukwa eMgungundlovu kubhekwe eThekwini, ngeSonto
Image: LINDELANI MJWARA FACEBOOK
UMGIJIMI waKwaZulu-Natal, uLindelani Mjwara, ozogijima iComrades Marathon okwesibili nonyaka, ufuna ukugwema ukuqengqeleza phambili zisuka kulo mjaho ngenhloso yokonga amandla ukuze alwele ukungena kwabayishumi abaphambili.
IComrades yanonyaka yebanga lika-89.98km, izogijinywa kwehliwa kusukwa eMgungundlovu kubheke eThekwini, ngeSonto.
UMjwara (28) ongaphansi kweHollywood Athletics Club, ugijime okokuqala iTotalsports Two Oceans Marathon ebangeni lika-56km ngo-Ephreli.
Kulo mjaho, uMjwara waseMpendle, eMgungundlovu, uhlale phambili zisuka uhhafu webanga lalo mjaho kodwa wakhathala endleleni, wagcina ephume endaweni ka-29 ngesikhathi esingu-3:26:10.
Ugijime lo mjaho eqeda kudla umhlanganiso kwiHillcrest Marathon yebanga lika-21km ngesikhathi esingu-1:06:34 ngoFebhuwari. Ulandele ngokulala isihlanu kwiBaldwin Sport Peninsula Marathon yebanga lika-42km ngesikhathi esingu-2:24:01, waqeda endaweni yesishiyagalombili ebangeni lika-21km kwiHarry Gwala Marathon.
“Uma ngiqhathanisa nonyaka odlule, kulo nyaka ngizilungiselele ngokwanele ukuyogijima kwiComrades, futhi nginokuzethemba okukhulu kokuthi ngizofika ngenze kangcono kakhulu kunangonyaka odlule. Inhloso enkulu yokugijima kwami iTwo Oceans bekuwukuyozivivinyela iComrades ngenxa yebanga layo. Ngifunde lukhulu ngokugijima kwami kwiTwo Oceans. Ukuhlala kwami phambili zisuka, bekuyiyona ndlela yokuzikala amandla ami emijahweni yamabanga amade kwazise bengingumuntu wamabanga amafishane isikhathi esiningi,” kusho uMjwara oqeqeshwa nguProdigal Khumalo.
“Ukuqeda kwami umjaho iTwo Oceans ngikuthathe njengento ebalululekile kimina nakumqeqeshi wami ngoba ngifunde okuningi. Kwesinye isikhathi ungahlala phambili zisuka ugcine uwunqoba umjaho futhi ngibabonile abanye abagijimi bekwenza lokho. Kodwa kwiComrades yalo nyaka engizoyigijima okwesibili, ngizimisele ngokuhlala ebhantshini, ngibe phakathi kwezinsephe zabagijimi, ngingajahi ukuqengqeleza phambili, bese kubonakala ukuthi ngenza njani ukusuka lapho. Inhloso yami enkulu wukulwela ukungena kwi-Top 10, okunye sekuyozenzekela. Ngokwesimo somzimba nengqondo ngizizwa ngiyilungele inselelo yomjaho."
Emijahweni emine eyedlule yeComrades kwabesilisa kukhonye abagijime beNedbank Running Club okungu-Edward Mothibi ngo-2019, uTete Dijana ngo-2022 no-2023, ngo-2024 kwaba ngu-Piet Wiersma waseNertherlands.
Kugcine ngo-2018, ngoBongumusa Mthembu we-Arthur Ford Athletics Club, ukuthi umgijimi waKwaZulu-Natal adle umhlanganiso kulo mjaho.
Kwababhekiwe nonyaka kubalwa yena uMthembu nyakenye othathe isithupha, uMhlakwana othathe indawo ka-19 kwiComrades nesine kwiTwo Oceans nonyaka, no-Ayanda Ngcobo othathe isibili kwiPrince Mangosuthu Ultra Marathon yebanga lik-52km ngo-Ephreli.