Kungase kucace namuhla ngecala leDurban City
UMDLALI weDurban City, uSaziso Magawana, amaqembu amabili iJDR Stars neCape Town amangalele iqembu lakhe ngokuthi alimbhalisanga ngokusemthethweni esuka kwiMarumo Gallants
Image: BACKPAGEPIX
KULINDELEKE lingene namuhla icala elidluliselwe kumahluleli yiJDR Stars neCape Town Spurs abamangalele iDurban City ngokudlalisa uSaziso Magawana "engabhalisiwe ngendlela efanele".
Amehlo azobe ethe njo kuleli cala kwazise umphumela walo uzocacisa ngekusasa leCity eqede esicongweni se-log yeMotsepe Foundation Championship neSpurs egawulwe yizembe ngenxa yokuqeda endaweni ka-15.
Ngokuthola kwaleli phephandaba, izinhlangothi zombili - iJDR neSpurs - zinikezwe yiSouth African Football Association (Safa) ithuba lokukhetha umehluleli ozosingatha icala ngendlela efanele kwabathu abaphakanyiswe yile nhlangano eyengamele ibhola eMzansi.
Kubahluleli obekufanelwe kuqokwe kubona ngu-Adv R. Nyman, Adv N. Cassim no-Adv Terry Motau.
Okubangwayo wukuthi incwadi ekhulula uMagawana kwakufanele ikhishwe yiLeruma United eyathenga isitifiketi seMarumo Gallants esesemabhukwini ayo.
La maqembu achithwe yikomiti lePremier Soccer League (PSL) eliqondisa ubugwegwe ngeledlule, okuholele ekutheni adlulele kumahluleli ozimele weSafa ozokhipha isinqumo esiwujuqu.
Lokhu kwenze iPSL yamisa ukunikezwa ngokusemthethweni indebe yeMotsepe Foundation kweCity engompetha beligi ngokwamaphuzu ewanqobile.
Uma iCity ilahlwa yicala, isengcupheni yokwephucwa amaphuzu kuyona yonke imidlalo engu-28 okudlale kuyo uMagawana, igawulwe yizembe kwiChampionship. Ngakolunye uhlangothi ukuthethwa kwayo yicala kuzobuyisela kwamane isibalo samaqembu aKwaZulu-Natal adlala kwiPremiership kulandela ukuxoshwa kwiPSL kweRoyal AM.
Kusalindwe umdlalo weSuperSport United neLamontville Golden Arrows ozobuyela ensimini maduze ukuze kucace ngeqembu lePremiership elizoqeda endaweni ka-15, lidlale amaPlay Offs ne-Orbit College neCasric Stars abaqede endaweni yesibili neyesithathu kwi-log yeChampionship.
Seliphakathi kweSuperSport neCape Town City iqembu elizodlala amaPlay Off namabili eChampionship.