Ezemvelo zithole ukuphefumula zibuya namaphuzu abalulekile
ABADLALI be-Ezemvelo Women's FC edlala kwiHollywoodbets Super League ebuye namaphuzu amqoka ngempelasonto inqoba iRoyal AM Ladies kowabakhaya baKwaZulu-Natal
Image: EZEMVELO WOMEN'S FC FACEBOOK
EZEMVELO Women’s FC ibuye namaphuzu amqoka ngempelasonto ngokushaya iRoyal AM Ladies kowabakhaya baKwaZulu-Natal weSafa Hollywoodbets Super League, eHarry Gwala Stadium, eMgungundlovu, ngoMgqibelo.
Igoli enqobe ngalo Ezemvelo kulo mdlalo livalelwe phakathi ngu-Amanda Mkhize, nokho ogcine ephuma ngekhadi elibomvu ngesiwombe sesibili.
Ukunqoba kwaleli qembu eliqeqeshwa nguRichard “Mrich” Zuma nelingomakoti kulesi siga seSuper League, kusho ukuphefumula njengoba beselihlulwe imidlalo emithathu ilandelana, liguqiswa yiRichmond United, TUT Football Club neTS Galaxy Queens.
Njengamanje leli qembu laseMlazi lisendaweni yesishiyagalombili kwi-log ngamaphuzu angu-15 emidlalweni engu-11.
Kanti ukushaywa kwe-AM Ladies kusho ukuqhubeka kokubhimba kwezinto kuleli qembu laseMgungungundlovu eliqeqeshwa nguPhilani Cele, elibalwa namaqembu adonsa kanzima selokhu kuqale le sizini ka-2025 yeSuper League njengoba kumanje lisendaweni ka-15 kwi-log ngaphezudlwana kweDurban Ladies eyibambe emsileni we-log endaweni ka-16.
Empeleni iDurban Ladies ne-AM Ladies yiwona maqembu aseKZN adonsa kusukela kuqale le sizini, ikakhulukazi iDurban eqeqeshwa nguSiphephelo Makhaye engakanqoba nowodwa umdlalo kule sizini njengoba sezibheke ekusongweni komzuliswano wokuqala wesizini.
IDurban iphindwe yalahla amanye amaphuzu iguqiswa yi-University of JHB ngo 3-1 ngawo uMgqibelo, e-UJ Compas Stadium, eSoweto.
Phezu kokuba amaqembu asazihola phambili kwi-log, iMamelodi Sundonws Ladies, TS Galaxy neJVW FC, bengadlalanga ngempelasonto ngenxa yokuthi abadlali bala maqembu beseqenjini lesizwe iBanyana Banyana, kodwa asaqhubeka nokuzihola phambili kwazise i-TUT ewalandela eduze, ilahle amaphuzu iguqiswa yiCity Lads ngo 1-0.
IRoyal AM izobuyela ensimini ngempelasonto ngomdlalo onzima neSundowns, ngoMgqqibelo, eHarry Gwala, ngo-3 ntambama, iDurban Ladies idlale ne-University of Western Cape (UWC), eSugar Ray Xulu Stadium, eClermont, ngeSonto ngo-11 emini.
Ezemvelo zidlale neJVW ngalo iSonto eSugar Ray, ngo-3 ntambama.
Imiphumela yeHollywoodbets Super League:
University of JHB 3-1 Durban Ladies; UWC 0-0 University of Pretoria; Copper Belts FC 2-0 First Touch FC; Royal AM 0-1 Ezemvelo Women’s FC; University of Fort Hare 3-0 Richmond United; City 1-0 TUT Football