Ushaye ungqimphothwe uMokoena eseka abakhaya kolwe-ASA

PHEZU kokuphuma phambili ekumangaleleni iKwaZulu-Natal Athletics (KZNA) enkantolo ngokungafakwa kwegama lakhe ohlwini lwabazongenela ukhetho lwe-Athletics South Africa (ASA), kodwa uSello Mokoena uzoqhubeka nokweseka ozakwabo baKwaZulu-Natal okhethweni olunamuhla eGoli. 

Lokhu kuqinisekiswe nguyena uMokoena othe usenqume ukuhoxa ekungeneleni ukhetho lukamengameli nelephini likamengameli we-ASA, olunamuhla eGoli. 

Kulolu khetho lukazwelonke lokukhetha ubuholi obusha bale nhlangano yezokugijima, iKwaZulu-Natal imelwe ngu-Aleck Skhosana ogaqele esikamengameli, noSteve Mkasi ogaqele esephini (likamengameli). 

USkhosana uzobanga noJohn Mathane, Harold Adams, Shireen Nobles, noJames osengumengameli we-ASA.

UMkasi uzobanga noKarabo Mabilo, Ludwick Mamabolo, Sticks Stiglingh, Nobles, Mathane no-Adams.

Ngesikhathi kukhishwa uhlu lwabangenele ukhetho lwale nhlangano ephethe ezokugijima kuleli, uMokoena uthole ukuthi igama lakhe kalikho, okuyingakho ebe esefaka icala emangalela iKZNA ne-ASA ngenxa yokungabi khona kwegama lakhe. 

Icala lingene ngoLwesine eNkantolo ePhakeme yaseThekwini. Ngaphambi kokuba lingene icala ngoLwesine, i-ASA ibisimemezele ukuthi uMokoena angakwazi ukufaka igama lakhe, kwasala iKZNA kuphela.

Inkantolo ivune yena uMokoena, yathi angakwazi ukungenela isikhunda sokuba ngumengameli, esesekela nesokuba yilungu elengeziwe.

“Ngijabule ngokuthi lolu daba lugcine ludlulile, sengizokwazi ukuba yingxenye yokhetho lwe-ASA. I-ASA ibisivele ilihoxisile icala. Ngikhuluma nje kumanje ngibheke khona eGoli. 

Njengoba ngiqokelwe ezikhundleni ezintathu, ngithathe isinqumo sokuhoxa ngoba ngeseka uSkhosana esisuka naye lapha KwaZulu-Natal kanti nesesekela mengameli sengihoxile kuso ngayekela umengameli  uMkasi (Steve). Mina ngizothatha esokuba yilungu elengeziwe kuphela,” kusho uMokoena.

Ebuzwa ngesinqumo sakhe sokuhoxa ekungeneleni ukhetho lwe-ASA, uMokoena, uthe ubona kufanele kubekwe phambili umdlalo wezokugijiima kunokulobizela izikhundla.

“Ngikholwa wukuthi akufanele sibeke phambili ukuhalela izikhundla, kodwa kufanele sibheke umdlalo wethu wezokugijima obhekene nezinselelo eziningi. 

Kumanje umdlalo wethu unezinxushunxushu, izinto azihambi kahle kunezinkinga eziningi. 

Ngakho kulesi simo esibhekene naso kufanele sibheke ukuthi ngobani abangasisiza ukuze siphume kulesi simo esinzima esikuso, sisebenzisane nabo ngokubambisana.

Ngakho ngibone kufanele ngeseke uSkhosana ngoba akamusha ekuphatheni i-ASA, futhi nangesikhathi kusaphethe yena izinto bezingcono kunamanje,” kuqhuba uMokoena. 

Nokho ukuqinisekisile ukuthi usazoqhubeka nokusingenela isikhundla sokuba ngumengameli weKZNA, okhethweni oluzokuba ngoJuni 14, eWestville, eThekwini. 

Uthe uma engaphinda akhethwe ekwengameleni iKZNA angaqhubeka lapho agcine ngokuvumbulula amakhono esifundazweni. 

Kwesokugaqela isikhundla sokwengamela iKZNA uzodlana imilala noMkasi okunguyena osengumengameli, uMandla Mngomezulu noChristopher White.