Amajita naMajimbos aseqhathiwe kweyeNdebe yoMhlaba

IQEMBU lesizwe laseNingizimu Afrika  lika-Under 20, Amajita, likleliswe kuGroup E emqhudelwaneni weNdebe yoMhlaba eliqhathwe kuwona neFrance, USA neNew Caledonia.

Amaqembu azodudulana kulo mqhudelwano aqhathwe izolo, eSantiago, eChile, okuyilapho lo mqhudelwano  uzodlalelwa khona ngoSepthemba 27 kuya ku-Okthoba 19. 

Sekungumlando ukuthi Amajita azibekisele indawo koweNdebe yoMhlaba ka-Under 20 ngokuba ngelinye lamaqembu amane aqede phezulu kwi-Africa Cup of Nations (Afcon) Under 20, agcina egoduke nendebe emuva kokuguqisa iMorocco ngo 1-0 kowamanqamu, e-Egypt, kule nyanga. 

Leli qembu eliqeqeshwa nguRaymond Mdaka, libhale kabusha umlado weNingizimu Afrika emqhudelwaneni we-Afcon U-20, kwazise iqembu lika-1997 lakuleli eladlala okokuqala kulo mqhudelwano lahlulwa kowamanqamu.

Amajita aphakathi kwamazwe amane ase-Afrika azomela leli zwekazi kwiNdebe yoMhlaba ka-Under 20, okubalwa kuwo iNigeria, Egypt neMorocco.

INigeria ikleliswe kuGroup F neColombia, Norway neSaudi Arabia. I-Egypt ikleliswe kuGroup A neJapan, New Zealand nosokhaya iChile. Kanti iMorocco ikleliswe kuGroup C neBrazil, Mexico neSpain.

I-Uruguay okuyiyona eyanqoba iNdebe yoMhlaba ka-U-20 ngo-2023 iguqisa i-Italy ngo 1-0 kowamanqamu, ayilibonanga elidlalayo njengoba ihlulekile ukuzibekisela indawo emqhudelwaneni wanonyaka. 

Amajita anenselelo yokwenza kahle kulo mqhudelwano njengoba engakaze adlule esigabeni sika-Last 16 kusukela adlala okokuqala ngo-1997.

Egcina ukudlala kulo mqhudelwano owawusePoland, ngo-2019, aphuma esigabeni samaqoqo. 

Ngakolunye uhlangothi, iqembu lakuleli lika-Under 17, Amajimbos, nalo seliyazazi izimbangi elizodudulana nazo koweNdebe yoMhlaba ka-Under 17 ezobanjelwa eQatar, ngoNovemba. 

Amajimbos akleliswe kuGroup A lapho eqhathwe khona ne-Italy, Bolivia nosokhaya iQatar. 

Leli qembu eliqeqeshwa nguVela Khumalo, yize lehlulwe kuma-quarterfinal e-Africa Cup of Nations (Afcon) U-17, eMorocco ngo-Ephreli, kodwa liphakathi kwamaqembu ayishumi ase-Afrika azibekisele indawo kwiNdebe yoMhlaba ka-U-17 ezodlalelwa ngamaqembu angu-48 okokuqala emlandweni.

Amanye amazwe ase-Afrika azodlala kwiNdebe yoMhlaba ka-U-17, yiBurkina Faso, Mali, Morocco, Zambia, Ivory Coast, Senegal, Tunisia, Egypt ne-Uganda.