Kuzoshiyana amaqhinga kwabePSG ne-Inter kowamanqamu we-Uefa
UMQEQESHI weParis Saint Germain (PSG), uLuis Enrique, ozobe ebhekene ne-Inter Milan kowamanqamu we-Uefa Champions League, namuhla ebusuku
Image: EPA
UMQEQESHI we-Inter Milan ozobe ebhekene neParis Saint Germain (PSG) kowamanqamu we-Uefa Champions League namuhla ebusuku
Image: EPA
PARIS SAINT GERMAIN v INTER MILAN
E-ALLIANZ ARENA, EMUNICH
NAMUHLA NGO-9PM
UEFA CHAMPIONS LEAGUE
NGAPHANDLE kokubhekwa ngabomvu yizinkumbi zabathandi bebhola namaphanta komdlalo wanamuhla wamanqamu e-Uefa Champions League phakathi kweParis Saint Germain (PSG) ne-Inter Milan, lo mdlalo umqoka ngezizathu ezahlukene kubaqeqeshi bawo womabili la maqembu azogadulisana e-Allianz Arena yodumo.
I-PSG eyizingqungqulu zaseFrance esezikhonye isikhathi eside kwiligi yakhona, iLigue 1, eseziyinqobe amasizini amane elandelana kusukela ngeka-2021/22 kuya kweka-2024/25, kayisenantanga eFrance ngokwezicoco.
Ngakho iChampions League sekuyisona kuphela isicoco eshoda ngaso ukugcwalisa ubunkunzi bayo ebholeni lase-Europe.
Sekuyisikhathi abaphathi be-PSG bekhombisa ukushabashekela impumelelo yesicoco seChampions League ngokusayinisa izihlabani zabadlali abahlonishwayo, okubalwa kuzo uThiago Silva, Angel Di Maria noNeymar.
Nebala leli qembu lafinyelela okokuqala kowamanqamu eChampions League ngesizini ka-2019/20 lapho laligqishe khona ngalezi zihlabani kodwa lakhala ngaphansi kwiBayern Munich ngo 1-0.
Ngemuva kokwehluleka kwayo ukunqoba iChampions League ngo-2020, i-PSG ngesizini ka-2021/22 yabe isilanda isihlabani, uLionel Messi, sisuka kwiBarcelona esasinqobe nayo izicoco ezine zeChampions League.
Nokho lo mdlali odabuka e-Argentina kumasizini amabili egijima kuleli qembu laseFrance, uhlulekile ukufeza alandelwa khona, waze washiya kuleli qembu nozakwabo uNeymar ekupheleni kwesizii ka-2022/23.
Nokho ukuthatha izintambo kukaLuis Enrique ekuqeqesheni leli qembu laseFrance ngaphambi kokuqala kwesizini ka-2023/24 esuka eqenjini lesizwe laseSpain, kubuyise ithemba ngezinhloso zaleli qembu zokuphinda lilwele ukuzuza isicoco seChampions League.
U-Enrique osengumakadebona noseke wayinqoba iChampions League ngesizini ka-2014/15 esaqeqesha iBarcelona, ufike kwezwakala kuleli qembu laseFrance elihola lifinyelela kweyandulela owamanqamu ngesizini edlule, njengoba kule sizini eselibeke kowamanqamu okwesibili emlandweni walo.
Ngakolunye uhlangothi, umqeqeshi we-Inter Milan, uSimone Inzaghi, ofike kwezwakala kuleli qembu lase-Italy alijoyine ngesizini ka-2021/22, unesilonda ngeChampions League. Waphucwa iqatha emlonyeni yiManchester City kowamanqamu alo mqhudelwano ibaguqisa ngo 1-0 e-Ataturk Olympic Stadium, e-Instabul, eTurkiye.
Ngemuva kokuphunyukwa yisicoco seligi yeSerie A yase-Italy kule sizini esanda kusongwa ka-2024/25 esinqotshwe yiNapoli, lo mqeqeshi unenselelo yokuthoba izinhliziyo zabalandeli baleli qembu ngokubanqobela iChampions League abayigcina ngesizini ka-2009/10.