UZwane uwunika uMofokeng owePSL Footballer of the Season
ISIHLABANI se-Orlando Pirates, uRelebohile Mofokeng, otuswa ngumqeqeshi waMaZulu FC, u-Arthur Zwane, njengofanelwe wumklomelo wePSL Footballer of the Season
Image: BACKPAGEPIX
UMQEQESHI waMaZulu FC, u-Arthur Zwane, ubona isiphekepheke somdlali wasophondweni lwesokunxele kwi-Orlando Pirates, uRelebohile Mofokeng, sifanelwe wumklomelo wePSL Footballer of the Season.
UMofokeng (20) kubukeka lo mklomelo ezowubanga nomgadli weMamelodi Sundowns, uLucas Ribeiro.
UMofokeng okuyisizini yakhe yesibili edlala eqenjini elikhulu lePirates akhushulelwe kulona esuka kwelincane elidlala kwiDStv Diski Challenge, ushaye into ecokeme kweZimnyama ezidle indebe yeMTN 8, zafinyelela nakowandulela owamanqamu weCaf Champions League.
Emidlalweni engu-47 ayidlalile kule sizini kuyona yonke imiqhudelwano (ngaphambi kowakusasa neMagesi FC), ushaye amagoli angu-12, waba nesandla kwangu-14.
Ngakolunye uhlangothi, uRibeiro osehlohle amagoli angu-20 kuyona yonke imiqhudelwano, uthwelwe ngeqoma embangweni wePSL Footballer of the Season. Usevele uwudlile owamagoli, iLesley Manyathela Golden Boot ngamagoli angu-16 awashaye kwiBetway Premiership.
“Angifuni ukuzwakala njengomuntu ophikisayo kodwa uma ubheka uRele (Mofokeng) uyithwalile i-Orlando Pirates isizini yonke. Uma ubuka uRibeiro, usanda kuwina iligi neSundowns, vele kumfanele ukuthola umklomelo wePSL Footballer of the Season, akufanele sidle amandla akhe, udlale kahle. Kodwa kumdlali omncane njengoRele, uma ubheka akwenzile kule sizini ethwala iqembu elikhulu emahlombe akhe, kuyamangaza.
Sikhuluma lapha ngomdlali nakanjani ozoya kwiNdebe yoMhlaba yeFifa (uma iBafana Bafana iphumelela kweyokuhlunga). Angifuni kodwa kuthiwe ngiyamqoka ngoba angiyena umqeqeshi weqembu lesizwe,” kusho uZwane.
“Kodwa uma ubheka indlela umqeqeshi (weBafana) uHugo Broos enza ngayo izinto nangendlela abafaka ngayo abadlali abancane eqenjini elikhulu lesizwe, kuyacaca ukuthi kube yigxathu elikhulu kuRele ngoba akadlalanga (kakhulu) emaqenjini esizwe ka-Under 20 no-Under 23 njengabanye ontanga yakhe, uqonde ngqo eqenjini elikhulu.
Ngakho akukho ukungabaza ukuthi uzodlala kwi-Africa Cup of Nations nakwiNdebe yoMhlaba."
Umklomelo wePSL Footballer of the Season uzovotelwa ngabaqeqeshi bamaqembu angu-15 ePrimiership.