UNcikazi uvikela injejane ngokuphunyuka kwezindebe kwiBucs
UMOHAU Nkota noRelebohile Mofokeng be-Orlando Pirates abangabanye babadlali abasebancane baleli qembu asebephenduke izinsika zaleli qembu laseSoweto.
Image: BACKPAGEPIX
UYAYICHITHA umqeqeshi we-Orlando Pirates osabambile, uMandla Ncikazi, eyokuthi ukungabi namava kwabadlali abasebancane baleli qembu yikho okube yimbangela yokwehluleka kwalo ukuzuza ezinye izicoco.
Ngemuva kokuvikela isicoco se-MTN 8 okwehlandla lesithathu amasizini elandelana ekuqaleni kwesizini, iPirates ibinezinhloso zokunqoba nezinye izicoco ngesizini ka-2024/2025.
Nokho amathemba ashabalele ngesikhathi leli qembu laseSoweto liphunyukwa yisicoco seligi yeBetway Premiership. Ngaphambi kwalokho liguqiswe yiPyramids yase-Egypt kweyandulela owamanqamu eCaf Champions League. Kowamanqamu weNedbank Cup likhale ngaphansi kwiKaizer Chiefs.
Ukuyilahla ekugcineni kweZimnyama, ebezibukeka ziza kabi kule sizini, kuqubule izinkulumo kwabanye abalandeli bebhola beshaya amakhala ngokwethembela kakhulu kwaleli qembu kubadlali abasebancane.
Injejane yaleli qembu ekhushulelwe eqenjini elikhulu isuka kweleDStv Diski Challenge ifike yashaya into ecokeme. Kulaba badlali kubalwa uRelebohile Mofokeng, Mohau Nkota noMbekezeli Mbokazi.
“Uma udlalisa uNkota e-Egypt (Champions League), udlalisa uSelepe (Simphiwe) kowabakhaya baseSoweto, okuyimidlalo emqoka kakhulu, ngokwami ngibona okuhle ngalokho ngoba kubanike amava okudlala emidlalweni yalolu hlobo,” kusho uNcikazi.
“Iqembu liyakhula futhi ngicabanga ukuthi lisayibambe ngohlelo ngokukholelwa kubadlali abasebancane. Kuyinto enkulu kithina njengeqembu ukwenza lokhu, mhlawumbe namanye amaqembu kufanele asike iphethini ngoba kuyisinqumo esidinga isibindi esikhulu ukwenza lokhu esikwenzayo ngakho angikuboni okungalungile ekunikeni ithuba abadlali abasakhula."
Ngaphandle kukaMofokeng, osedlale amasizini amabili eqenjini elikhulu leZimnyama enza ezibukwayo, uNkota noMbokazi bakhushulelwe eqenjini elikhulu kule sizini.
UNkota udlale imidlalo engu-38, washaya amagoli ayisikhombisa waba nesandla kwamahlanu kuyona yonke imiqhudelwano.
UMbokazi, okhushulelwe eqenjini elikhulu maphakathi nesizini, udlale engu-18 washaya igoli elilodwa, waba nesandla kwelilodwa.
USelepe, othole ithuba ngasekupheleni kwesizini, ukhombise izimpawu zokuba ngumdlali obukhali emidlalweni emihlanu ayidlalile washaya igoli elilodwa.
EZimnyama, esezivele zizibekisele indawo kwiChampions League ngesizini ezayo ngokuqeda endaweni yesibili kwi-log yePremiership, zizosonga isizini ka-2024/25 ngomdlalo wasekhaya neMagesi FC, e-Orlando Stadium, eSoweto, namuhla ngo-7.30 ebusuku.