Ogaqele ese-KZNA ufuna kuthuthukiswe imijaho yasemalokishini nasemakhaya
UMANDLA Mngomezulu oyiphini likamengameli we-KZN Athletics ekhuluma nabezindaba ngenkathi ethula umqulu wakhe wokhetho lobuholi be-KZNA oluzoba ngenyanga ezayo
Image: SIBUSISO MDLALOSE
OGAQELE isikhundla sokuhola iKwaZulu-Natal Athletics (KZNA), uMandla Mngomezulu, ukubeke eqhulwini ukuvuselela nokuthuthukiswa kwemijaho yasemalokishini nasemakhaya eminye yayo esiyafadalala, ukuvikeleka kwabagijimi besifazane nokwenyusa izinga lezokugijima ezikoleni.
UMngomezulu oyiphini likamengameli we-KZNA obethula umqulu wakhe wamaphuzu ayisishiyagalombili wokungenela ukhetho eMax’s Lifestyle eMlaza, izolo, uphakathi kwezikhulu ezigaqele isikhundla sokuhola le nhlangano yezokugijima esifundazweni njengoba kubhekwe okhethweni oseluseMome lokukhetha ubuholi obusha.
Kulolu khetho oluzokuba ngoJuni 14, uMngomezulu uzodlana imilala noSteve Mkasi okunguyena ophethe esokuba ngumengameli we-KZNA, uSello Mokoena noChristopher White.
UMngomezulu ongomunye wabaphathi bekilabhu yezokugijima, i-Xcel, esungulwe ngo-2020, ube yiphini likamengameli we-KZNA ngo-2021.
“Uma ngingathatha isikhundla sokuhola i-KZNA, phakathi kwezinto eziseqhulwini engizibophezela ukuzenza ukwenza isiqiniseko sokuthi iyabuyisawa ithuthukiswe imijaho yasemalokishini esasinayo phambilini, okubalwa kuyona oChesterville 10km, KwaMashu 10km, Edendale 10km, Township To Township Marathon (eyayigijinywa phakathi koMashu, Chesterville noMlazi).
Kanjalo nemijaho yasemakhaya enjengeZululand Marathon, Dumbe nakoMadadeni, eNewcastle, okuyimijaho eyayinika abagijimi basemakhaya nasemalokishini ithuba elihle lokuveza ikhono labo.
Akufanele abagijmi basemakhaya bazithole behamba amabanga amade ngezithuthi beyongenela imijaho emadolobheni amakhulu, ekubeni ingaba khona indlela yokuthi babe nayo imijaho ezindaweni nasezifundeni ababuya kuzo,” kusho uMngomezulu, othe kufanele isifunda nesifunda okungenani sibe nomjaho we-relay nowe-5km.
“Omasipala kufanele babambe iqhaza ekuthuthukisweni kwengqalasizinda, nobuholi bami ngingabamba iqhaza ekunxenxeni omasipala bakuqonde ukubaluleka kokuthuthukisa ingqalasizinda ukuze ezokugijima zihambe ngendlela efanele zithuthukise nomnotho, ikakhulukazi ezindaweni zasemakhaya.
"Bese kuzoba ukuvikeleka kwabagijimi besifazane nokuthuthukiswa kwabo ikakhulukazi ekubaqeqesheni ukuze sibe nabaqeqeshi abaningi besifazane abangabaqeqeshi babagijimi, njengoba sisephansi kakhulu isibalo sabo,” kuqhuba uMngomezulu.
“Nakhona ezikoleni kumqoka kakhulu lenyuswe izinga lezokugijima, kube khona nemifundazwe esizoyinikeza abafundi abenza kahle ezifundweni nasekugijimeni. Kungagcini lapho, silwele nokuthi imiqhudelwano yezokugijima kulesi sifundazwe ibe nemiklomelo ebhekile ehlonyulwa ngabagijimi, kwazise izimpahla abazisebenzisayo ukuziqeqesha ziyabiza futhi abanye baziphilisa ngakho ukugijima.”
Ukhetho lwe-KZNA luzolandela umjaho omkhulukazi iComrades Marathon webanga lika-89.98km ozobe wehla kusukwa eMgungundlovu kubhekwe eThekwini, ngoJuni 8.