IBucs ivalelise uRiveiro ngewini ishovela phansi i-Arrows
UMBEKEZELI Mbokazi we-Orlando Pirates eshikilisana noNduduzo Sibiya weLamontvillle Golden Arrows emdlalweni weBetway Premiership e-Orlando Stadium, eSoweto, izolo ebusuku
Image: BACKPAGEPIX
Orlando Pirates (1) 3
Golden Arrows (0) 0
I-ORLANDO Pirates imvalelise ngesitayela umqeqeshi wayo oseshiya, uJose “Spanish Guitar” Riveiro, ngokubhaxabula iLamontville Golden Arrows emdlalweni weBetway Premiership e-Orlando Stadium, eSoweto.
Amagoli enqobe ngawo iPirates kulo mdlalo avalelwe phakathi uTshegofatso Mabasa ngesiwombe sokuqala, Bandile Shandu noKabelo Dlamini ngesiwombe sesibili.
IPirates inqoba lo mdlalo weligi nje, akukapheli zinsuku zingaki ibuye nenduku yombangandlala ngempelasonto, iguqiswa yizimbangi zayo ezinkulu iKaizer Chiefs ngo 2-1 kowamanqamu weNedbank Cup.
Bekungumdlalo wokugcina womqeqeshi uRiveiro esebhentshini lePirates kulandela ukumemezela kwaleli qembu ngoMsombuluko ukuthi uzoshiya engakayiqedi isizini ngoba esecele ukushesha akhululwe, ayoqala umsebenzi wakhe omusha kwelinye lamaqembu ase-Egypt.
Ushiya kuleli qembu laseSoweto eselinqobele izindebe ezinhlanu, okungezintathu ze-MTN8 nezimbili zeNedbank Cup, walifinyelelisa nasemdlalweni owandulela owamanqamu weCaf Champions League kumasizini amathathu ekuleli qembu alijoyine ngesizini ka-2022/23.
Yize eZimnyama zinqobile kulo mdlalo kodwa ngokwezibalo zamaphuzu asemancane kakhulu amathuba okuthi zisengakwazi ukugudluza iMamelodi Sundowns esicongweni se-log yePremiership.
ISundowns esavule igebe lamaphuzu angu-12, isidinga iphuzu kuphela emidlalweni emibili eyisalele ngaphambi kokusonga isizini nosekusho umqansa ongakhwelwa mbongolo kweZimnyama ekugudluzeni amaSandawana njengoba noma zingayinqoba le midlalo emine ezisalele, zizophelela emaphuzwini angu-67. Lawa ngamaphuzu amaSandawana asenawo kwi-log.
Lokhu kusho ukuthi eZimnyama sekumele zithandazele ukuthi amaSandawana ashaywe kuyo yomibili imidlalo ayisalele azoyidlala neChippa United neMagesi FC, bese zihlohla amagoli angu-26 emidlalweni emine ezisalele ukugudluza leli qembu lasePitoli okubukeka kuyinto okungelula neze ukuthi yenzeke.
Ngale kwalokho, eZimnyama zisesethubeni elihle lokugcina indawo yesibili kwi-log yePremiership, eyisango lokubuyelwa kwiChampions League ngesizini ezayo.
Zibuyela ensimini ngomunye umdlalo wasekhaya ne-TS Galaxy ngoMgqibelo. Ngakolunye uhlangothi, Abafana Bes’thende okumanje basendaweni ka-14 kwi-log, basengcupheni yokuyodlala amaPlay-Offs uma bengabhukuli kulemi dlalo emihlanu ebasalele.