USkhosana nesifiso sokutakula i-ASA uma ephinda ekhethwa
U-ALECK Skhosana ogaqele isikhundla sokwengamela i-Athletics South Africa (ASA) okwehlandla lesithathu njengoba zizodlana imilala okhethweni lobuholi obusha ngoMeyi 31
Image: BACKPAGEPIX
OGAQELE isikhundla sokuhola i-Athletics South Africa (ASA), u-Aleck Skhosana, ukubeka ngokucacile ukuthi uma ephinda ekhethwa, okuseqhulwini kuyena wukubuyisa isithunzi sale nhlangano ethathwa njengesiphelelwe yisithunzi ngenxa yezinkinga eziningi eziyikhungethe.
USkhosana ongumakadebona ekuphatheni kwezokugijima ezingeni likazwelonke nelesi sifundazwe, uphakathi kwabahlanu abangenele ukhetho lokwengamela i-ASA, okubalwa kubona uJohn Mathane, Harold Adams, Shireen Nobles, noJames Moloi okunguyena ongumengameli osahola le nhlangano.
Kwabagaqele esephini likamengameli, kubalwa uSteve Mkasi, Karabo Mabilo, Ludwick Mamabolo, Sticks Stiglingh, Nobles, Mathane no-Adams. Zizodlana imilala okhethwenni oluzoba ngoMey 31, eGoli.
Engxoxweni abenayo neSolezwe Ngempelasonto, uSkhosana oseke waba ngumengameli we-ASA amahlandla amabili, uthe kumhlahlandlela wakhe wokhetho ufuna ukubona iNingizimu Afrika iba nkulu, iba namandla kwezokugijima emhlabeni.
“Kule minyaka emine ngingekho ebuholini be-ASA, kuningi kakhulu engikubonile okudinga ukulungiswa nengizimisele kakhulu ngokukwenza uma ngiphinde ngibuyela ekuholeni le nhlangano.
"Ngifuna ukuqhubeka lapho ngangigcine khona ngenkathi ngisahola le nhlangano, okumanje iphelelwe yisithunzi ngenxa yezinkinga eziningi eziyikhungethe, okubalwa nenkohlakalo.
"Ngifuna ukubona uguquko olunqala nokuvuselelwa kwabusha kwale nhlangano,” kusho uSkhosana owaphuma ngo-2021 ekwengameleni i-ASA ehlulwa nguMoloi okhethweni.
“Ngenkathi ngisengumengameli we-ASA ngo-2016, sathatha indawo yesihlanu kuma-Olympic Games emazweni angu-212 ayebambe iqhaza (eBrazil). Ngo-2017, sathatha indawo yokuqala, sibuya nenqwaba yezindondo emqhudelwaneni i-AAF World U-18 Championships (eKenya).
"Ngakho-ke phakathi kwezinye zezinto ezisemqoka emqulwini wami wokhetho ukuvuselela nokubeka phambilini ukuthuthukiswa kwezokugijima emazingeni aphansi kulo lonke izwe, ikakhulukazi ezindaweni zasemakhaya nasemalokishini.
"Ngifuna zonke izifundazwe zithuthuke kwezokugijima. Sinxenxe nomasipala abancane nabakhulu ukuba balungise, bakhe nezinkundla zokugijima. Kuqiniswe kakhulu ezikoleni, ukuthi zonke izikole ezingu-27 000 esinazo la eNingizimu Afrika zibe nawo umdlalo wezokugijima,” kuqhuba uSkhosana.
Ugcizelele nobumqoka bokucijwa kwabaqeqeshi, izimenenja nonompempe kwezokugijima ezweni lonke, nobumqoka bokuhlonishwa komthetho nokuqondiswa ubugwegwe ngendlela efanele kwabangahambisi ngendlela ekuphathweni komdlalo wezokugijima emazingeni ehlukene.
Ukubaluleka kokubuyiswa kokusakazwa komdlalo wokugijima eziteshini zemisakazo ezingu-18 ze-SABC, okubalwa nezikamabonakude, “Ngenye yezinto engiyozilwela lezo ngosuku lwami lokuqala ngikhethwe njengomengameli we-ASA, ukuthi kubuyiswe ukusakazwa komdlalo wezokugijima eziteshini ze-SABC.
"Baningi kakhulu abantu bakithi ezweni lonke abathanda ezokugijima abagcina bengakwazi ukubuka umdlalo abawuthandayo ngenxa yokwentula nokungabi nayo imali yokukhokhela iziteshi ezikhokhelayo.”