U-Arendse ubona izomkhulisa i-Afcon owaMajita
UMDLALI weSupersport United naMajita, uNeo Rapoo, umqeqeshi wakhe kwiSuperSport ovumayo ukuthi wayengafuni ukumdedela ayodlala kwi-Afcon U-20
Image: BACKPAGEPIX
UMQEQESHI osabambile kwiSupersport United, u-Andre Arendse, uveze ukuthi bekungelula ukudedela umdlali wakhe wasemuva, uNeo Rapoo, ongomunye wabadlali baleli qembu abashaye into ecokeme eqenjini lesizwe lika-Under 20, Amajita, elibuye nendebe ye-Under 20 Africa Cup of Nations (Afcon) e-Egypt, muva nje.
URapoo (19) oyibamba emuva kwesokunxele, ngomunye wabadlali abasebancane beSuperSport abakhushulelwe esikimini esikhulu besuka kweseDStv Diski Challenge. Ezinyangeni ezedlule, uchazwe ngobengumqeqeshi kuleli qembu, uGavin Hunt, njengomunye wabadlali basemuva kwesokunxele abasezingeni eliphezulu eNingizimu Afrika.
URapoo obeshintshana ngebhande likakaputeni noPatrick Autata weCape Town City kwi-Afcon, ubeyibambe nabanye ozakwabo kulo mqhudelwano okunguLazola Maku odlala esiswini noThabang Mahlangu ongumgadli.
“Ungumdlali omuhle kakhulu, engimjabulelayo ngokwenza kahle kwakhe kwi-Afcon Under 20. Ngemuva kokubizwa kwakhe eqenjini lesizwe lika-Under 20 ebeliya kwi-Afcon U-20, sixoxile nethimba labaqeqeshi, sibalula ukuthi ungumdlali omqoka eqenjini lethu. Ngemuva kokusenzela umsebenzi omuhle sanquma ukuthi simdedele ahambe neqembu lesizwe, yize bengithandi ukuthi adedelwe,” kusho u-Arendse.
“Bekubalulekile ukuthi ahambe ayofeza amaphupho akhe. Akuzuze kuloya mqhudelwano kuzomkhulisa kwenyuse nokuzethemba kuyena njengomdlali. Njengoba esebuyile sizomdinga njengabanye abadlali abayingxenye yeqembu. Siyiqembu elikholelwayo ekuthuthukisweni kwabadlali, ngingakubalela oRonwen Williams, Kermit Erasmus, Kamohelo Mokotjo, nabanye.
"Muva nje, uShandre Campbell ngomunye wabadlali abasuka ezinhlakeni zethu zabadlali abathuthukiswayo. Ngakho siyaziqhenya ngalokho.”
Nokho, u-Arendse uyakuqonda ukubaluleka kokuthola amaphuzu kwezakhe emidlalweni emibili ezakhe ezizoyidlala ngaphambi kokusonga isizini ukuze zigweme umshikashika wokuyodlala ama-Play Offs.
“Ikhona le nto okuthiwa yinhlanhla ebholeni, nokuyiyona esingenayo njengamanje thina uma ubheka indlela esidlale ngayo nePirates. Kuzomele sisebenze kanzima emidlalweni olandelayo, silungise amaphutha ngokushesha ngoba imidlalo iyasiphelela. Kodwa anginakho ukungabaza, abadlali bazowenza umsebenzi,” kuqhuba u-Arendse.
ISuperSport esendaweni ka-14 kwi-log yeBetway Premiership, isengcupheni yokuyodlala kuma-Play Offs ekupheleni kwesizini. Izotholana phezulu neRichards Bay FC ngoMgqibelo ngo-3 ntambama, ePeter Mokaba Stadium, ePolokwane.
Emuva kwalokho, izoqedela umdlalo neLamontville Golden Arrows omiswe zibambene ngo 1-1 ngenxa yokucima kukagesi eLucas Moripe Stadium, e-Atteridgeville, ngoFebhuwari. Lo mdlalo uzodlala imizuzu engu-45 ngenxa yokuthi umiswe sekufanele kuqale isiwombe sesibili.