UKadodia ucikwa eyokuvuswa kwamacala ekupheleni kwesizini

USIHLALO weDurban City, uFarook Kadodia, usephonsele inselelo iziphathimandla ezibhekene nomsebenzi wokuqulwa kwamacala nokuqondiswa ubugwegwe kwamaqembu kwiPremier Soccer League (PSL) ukuthi ziyifakele izibuko indaba yokumangalelana kwamaqembu isizini isiyophela.

UKadodia usho kanjena nje, namuhla kubhekwe ngabomvu isinqumo somshushisi wePSL ngecala elimayelana nomdlali weqembu lakhe, uSaziso Magawana.

Leli cala lifakwe yi-JDR Stars imangalela iCity iyisola ngokudlallisa lo mdlalo engabhalisiwe ngokufanele esuka kwiMarumo Gallants ngaphambi kokuqala kwale sizini. 

Uma iCity ilahlwa yicala, ingagawulwa yizembe kwazise uMagawana ongumdlali omqoka kuleli qembu udlale imidlalo engu-27 yeligi.

Ukulindwa kwalesi sinqumo kuholele ekutheni iCity inganikwa indebe yoMotsepe Foundation Championship ngeSonto, ngemuva kokuguqisa kwayo iCape Town Spurs ngo 1-0, e-Athlone Stadium, eKapa.

ISpurs egawulwe yizembe ngokushaywa kwayo yiCity, idlale lo mdlalo isifake icala elihambisana nelisezithebeni zePSL elimayelana naye uMagawana obeboshelwe yiqembu likaKadodia. 

“Siphoxeke kakhulu ngalesi simo, abadlali bebelindele ukunikwa indebe abayisebenzele kanzima isizini yonke kodwa akwangenzeka lokho ngenxa yaleli cala.

"Manje sekufanele balinde uLwesibili (namuhla) ngesinqumo, okungenzeka futhi lidonse icala uma kwenzeka liya kumxazululi.

"Esimweni esinje uqhubeka kanjani? Uyihlelela kanjani isizini ezayo, nabadlali baya nini ukuyobona imindeni yabo njengoba isizini isiphelile, bengakalazi ikusasa labo? Lesi yisimo esingesihle neze, esihambisana nokungabacabangeli abanye abantu," kukhala uKadodia. 

"Ngakho ngicabanga ukuthi iziphathimandla ezingeni lekomiti lokuqondisa ubugwegwe nokuqulwa kwamacala, ziyibhekisise le nto yokuthi kungani kuwona wonke amasizini amacala okumangalelana kwamaqembu equbuka ngalesi sikhathi sesizini?

"Ngikholwa wukuthi leli cala belingafakwa ngomzuliswao wokuqala wesizini. ILeruma (United) isimangalele ngoMashi kodwa ayangaqhubeka necala. Manje ngoba sekuyophela isizini sekubonakala ukuthi siyayiwina iligi, sekuqhamuka i-JDR isiyasimangalela, sesimangalelwa nayiCape Town Spurs futhi,” kusho uKadodia. 

Lesi sikhulu sisamile ekutheni bamsulwa kuleli cala abasolwa ngalo, bayilandela yonke imigomo yePSL ngokusayinisa uMagawana. 

Ukunyuka kweCity kubhekwe ngabomvu KwaZulu-Natal ngoba kungabuyisela isibalo kwamane amaqembu aqhamuka kusona adlala kwiPremiership kulandela ukushabalala kweRoyal AM.