Ingcindezi kwiDurban City kowasekhaya neLeopards

UMDLALO abazowudlala neBlack Leopards uwuthatha njengowokudlalela amaphuzu ayisithupha umqeqeshi weDurban City, uSimo Dladla, ezakhe ezisenethuba lokudla isicoco seMotsepe Foundation Championship. 

ICity izodudulana neLeopards emdlalweni omqoka weMotsepe Championship, eChatsworth Stadium, ngeSonto ngo-3 ntambama.

Iza kulo mdlalo nje, ibuya esibhaxwini sika 2-1 esithole kwiMilford FC ngoLwesithathu khona eChatsworth, nosekuyifakele ingcindezi enkulu yokunqoba kowangeSonto neLeopards. 

Lo mdlalo wangoLwesithathu neMilford ubuyiselwe ensimini kulandela ukumiswa kwawo ngo-Ephreli 22 kuyo le nkundla iMilford ihamba phambili ngo 1-0 ngemuva kokushona komdlali weCity, uSinamandla Zondi, owaqulekela enkundleni wagcina ngokushonela esibhedlela ngalo usuku lomdlalo. 

Ekubuyeleni kwawo ensimini ngoLwesithathu kudlalwe isiwombe sesibili kuphela njengoba wawumiswe ngesikhathi sekhefu sesidlaliwe isiwombe sokuqala. 

“Umdlalo wethu neLeopards ufana ngowamagqubu njengoba basishaya (ngo 2-1) ekuhambeni ngomzuliswaneni wokuqala. 

Ngakho sidinga ukuwunqoba lo mdlalo. Amaphuzu amathathu esingawathola kulowo mdlalo angafana namaphuzu ayisithupha kithina. Nokho sidinga ukubeka umoya phansi, siqhamuke nesu esizolisebenzisa ukubehlula,” kusho uDladla.

ICity okuyiyona esaqhwakele phezulu ngamaphuzu angu-52 idinga amaphuzu amathathu kulo mdlalo ezowudlala neLeopards ukuzibeka ethubeni elingcono kakhulu lokudla isicoco seChampionship, ukuze iye emdlalweni wayo wokusonga isizini neCape Town Spurs e-Athlone Stadium, eKapa ngoMey 18, isidinga iphuzu elilodwa ukuphakamisa isicoco. 

Njengamanje iCity imiswe kabi yi-Orbit College eyijoja eduze endaweni yesibili ngamaphuzu angu-49, yize umehluko wamagoli kuyiwona obeka iCity esimeni esingcono kune-Orbit ezotholana phezulu ne-JDR Stars ngalo iSonto eSoshanguve Stadium, eSoshanguve, ePitoli. 

Ngakolunye uhlangothi usihlalo nomqeqeshi weMilford, uXanti Pupuma, ezakhe ezibuye namaphuzu amqoka ngokuguqisa iCity, ukholwa wukuthi basenalo ithuba lokuzibekisela indawo kumaPlay-Offs.

“Sisekhona nathi, sisenethuba lokuyodlala amaPlay-Offs.  Ngakho sizolokhu siqhubekile nje sizama sibone ukuthi siphelela kuphi.

Sizobheka imidlalo yangengempelasonto yamanye amaqembu alwela ukuyodlala amaPlay-Offs ukuthi isibekaphi, njengoba nathi sinomdlalo wasekuhambeni ongelula neLeruma (United),” kusho uPupuma. 

IMilford esendaweni yesithupha kwi-log idinga ukuyinqoba yomibili imildlalo eyisalele, bese ithandazela ukuthi iCasric Stars, iLeopards neKruger United balahle amaphuzu ukuze ithole intuba yokungena kowamaPlay-Offs okuzabalazela ukukhuphukela kwiBetway Premiership. 

Imidlalo yeMotsepe Foundation Championship: 

NgeSonto - Ngo-3pm:

Baroka FC v Pretoria Callies (Global Stadium); Venda FC v Casric Stars (Thohoyandou Stadium); Durban City v Black Leopards (Chatsworth Stadium); University of Pretoria v Upington City (Tuks Stadium); Hungry Lions v Cape Town Spurs (Mxolisi Dicky Jacobs Stadium); JDR Stars v Orbit College (Soshanguve Stadium); Highbury v Kruger United (Gelvandale Stadium); Leruma United v Milford FC (Lucas Moripe Stadium)