IDowns iqhubekile nokuvula igebe kwiHollywoodbets

IMAMELODI Sundowns Ladies iqhubekile nokukhombisa ukuba yiqembu elisazothwalisa kanzima izimbangi zalo nakule sizini kwiHollywoodbets Super League njengoba isidlale imidlalo eyishumi ngaphandle ngokungenelwa yigoli.  

ISundowns inenebule iRichmod United ngo 6-0 ngoMgqibelo eLucas Moripe Stadium, e-Atteridgeville, yavula igebe lamaphuzu ayisikhombisa esicongweni se-log phakathi kwayo ne-TUT Football Club esendaweni yesibili.

Leli qembu eliqeqeshwa nguGodfrey “God Father” Sapula nelingompetha beligi yeHollywoodbets, selinqobe imidlalo eyisishiyagalolunye kwengu-10 esadlaliwe kule sizini ka-2025, njengoba sekusele emihlanu kuqedwe umzuliswano wokuqala.

Lizobuyela ensimini ngowomkhaya basePitoli, lapho izotholana phezulu ne-TUT ngeSonto, e-TUT Main Campus, ePitoli.

Kwenzeka lokhu nje, nezimbangi zayo i-University of Western Cape (UWC) ebezingayiqalanga kahle le sizini, sezivukile emaqandeni njengoba emidlalweni emithathu yakamuva zinqobe emibili, zadlala ngokulingana kowodwa. 

NgoMgqibelo, zibhaxabule i-University of JHB ngo 5-0, e-UJ Soweto Campus, eSoweto. Nokho leli qembu eliphekwa nguThinasonke Mbuli lisayibambe endaweni ka-10 kwi-log.

Kula masizini amathathu edlule, i-UWC yilona qembu ebelilokhu libanga neSundowns isicoco seligi, yize isalokhu iqhubekile nokukhonya kuleli ligi eseliyinqobe amasizini amahlanu elandelana. 

I-UWC izodlala neCopper Belts ngoMgqibelo, e-UWC Stadium, eKapa.

Ngakolunye uhlangothi, i-TUT ephekwa nguChristina Kutumela, isakhombise izimpawu zokuba yiqembu elingcono kakhulu kule sizini njengoba ihlezi endaweni yesibili kwi-log. 

Leli qembu eliqede endaweni ka-10 kwi-log ngesizini edlule, libuye namaphuzu amathathu ekuhambeni libhaxabula Ezemvelo Women’s FC ngoMgqibelo, e-SJ Smith Stadium, eLamontville. 

Imiphumela yeHollywoodbets Super League: 

TS Galaxy 1-0 UCT; Ezemvelo Women’s FC 1-3 TUT Football Club; Royal AM 0-0 Durban Ladies; Mamelodi Sundowns 6-0 Richmonda United; JVW 1-1 University of Pretoria; City Lads 2-2 First Touch Ladies; Copper Belts 0-1 University of Fort Hare; University of JHB 0-5 UWC