I-PSL ilichithe nezindleko icala ebelibekwe iCity
KUBUKEKA kungasekho okuzovimba iDurban City ekunikweni ngokusemthethwei indebe yayo yeMotsepe Foundation Championship ngokuba ngompetha kulandela ukuchithwa kwecala yi-PSL kwecala ebelibhekene naleli ngomdlali walo uSaziso Magawana
Image: BACKPAGEPIX
KUBUKEKA kungasekho okuzovimba iDurban City ukuthi inikwe ngokusemthethweni indebe yeligi ngokuba ngompetha besizini ka-2024/25 beMotsepe Foundation Championship kulandela ukutholwa imsulwa ecaleni ebelifakwe yiJDR Stars elimayelana nomdlali uSaziso Magawana.
Izolo, iPremier Soccer League (PSL) ilichithile icala leJDR Stars isola iCity ngokudlalisa uMagawana engabhalisiwe ngokusemthethweni esuka kwiMarumo Gallants ngaphambi kokuqala kwale sizini.
Namuhla ntambama ngo-4.30 ntambama, isigungu sePSL esiqondisa ubugwegwe sisazohlalela icala lesibili elifakwe yiCape Town Spurs ngaye uMagawana, kodwa kubukeka sekuzobe kuwukugcina icala.
I-Spurs egawulwe yizembe kwiChampionship yehlela kwi-ABC Motsepe League ngeSonto ngemuva kokushaywa kwayo ngo 1-0 yiCity, e-Athlone Stadium, eKapa, idlale lo mdlalo isifake icala ngemuva kokubona ukuthi ubosheliwe uMagawana.
Ethintwa yiSolezwe usihlalo weCity, uFarook Kadodia, uthe: “Yebo, ngingakuqinisekisa ukuthi sesiwunqobile umzuliswano wokuqala. Icala lokuqala ebelifakwe yiJDR Stars ilichithile iPSL, lihambisana nezindleko ezizokhokhwa yiJDR. Kusasa (namuhla) ngo-4.30 ntambama kuzohlalelwa icala lesibili elifakwe yiCape Town Spurs. Ngamafuphi nje, akusekho okuzosivimba manje ukuthi sinikwe ngokusemthethweni indebe yethu yeMotsepe Championship njengompetha abasemthethweni,” kushaya ngamafuphi uKadodia, eqinisekisa ukuthethwa yicala kwezakhe.
Lesi sikhulu besilokhu simile ekutheni bamsulwa kuleli cala abebesolwa ngalo, kwazise bayilandela yonke imigomo yePSL ngokusayinisa uMagawana.
UMagawana oyisiphekepheke somdlali wasophondweni lwesokunxele, udlale imidlalo engu-27 yeligi kule sizini. Ushaye amagoli amabili, waba ngumvusi wenyamazane kwamaningi. Ukhathule indima ebonakalayo empumelelweni yeCity eyagawulwa yizembe kwiPremiership ibizwa ngeMaritzburg United.
Ukukhushulelwa kweCity kwiPremiership kuzosho ukubuyisela isibalo kwamane amaqembu aKwaZulu-Natal adlala kwiPremiership kulandela ukushabalala kweRoyal AM.
I-Orbit College neCasric Stars okungamaqembu aqede endaweni yesibili neyesithathu kwi-log yeChampionship kule sizini, bazodlala amaPlay Offs neqembu lePremiership elizoqeda endaweni ka-15 kwi-log.