UMngqithi akanavalo ngokunyonyobelwa kwe-Arrows yizembe
Manqoba Mngqithi uManqoba Mngqithi umqeqeshi weGolden Arrows
Image: MALIBONGWE MDLETSHE Independent Media
PHEZU kokuphikwa yimiphumela emidlalweni yakamuva, kodwa umqeqeshi weLamontville Golden Arrows, uManqoba Mngqithi, akaziboni ezakhe zidliwa yizembe ekupheleni kwesizini yeBetway Premiership esisongwa.
I-Arrows esendaweni ka-13 kwi-log yePremiership okuyindawo engaphephile ezembeni, ilahle amanye amaphuzu ngempelasonto idlala ngokulingana ngo 0-0 neRichards Bay FC, kowePremiership, eKing Zwelithini Stadium, eMlaza.
Ibuya nephuzu kwiRichards Bay nje, ibisishaywe imidlalo emine ilandelana. Ihlulwe naMaZulu FC, Stellenbosch FC ne-Orlando Pirates kabili.
Yehlukaniswe ngamaphuzu amathathu neSupersport United neCape Town City abasendaweni ka-14 no-15 ngokulandelana.
Isalelwe yimidlalo emibili ezoyidlala neSekhukhune United ekhaya neSupersport ekuhambeni ukulwela ukuthola amaphuzu azoyisusa esishozini okudlalela kusona izembe.
“I-Arrows ngeke idliwe yizembe, kumele ukwazi lokho. Uma kwenzeka okunye ngiyobe ngikhona ukuphendula ukuthi kwenzeke kanjani,” usho kanje uMngqithi.
Ngenxa yokuxoshwa kweRoyal AM, iPremiership isisalelwe ngamaqembu angu-15. Lokhu kusho ukuthi iqembu elizoqeda endaweni ka-15 yilona elizodlala namabili eMotsepe Foundation Championship kuma-Play Offs.
Yize lo mqeqeshi enethemba elikhulu lokuthi ezakhe ngeke zidliwe yizembe, kodwa akakufihli ukukhathazeka kwakhe ngokuhluleka kwezakhe wukushaya amagoli.
“Sengike ngabona umgadli kuleli qembu ebhekene nonozinti, kungekho muntu phambi kodwa esafuna ukuphasela umuntu osemva kwakhe. Sengibone izinto ezimangazayo engingakaze ngicabange ukuthi ngingazibona ebholeni. Nokho ngisenalo ithemba, futhi ngikholwa wukuthi sisayibambe kahle ekwakheni iqembu elizoba yile nto engiyifunayo ngesizini ezayo.
Ngifike kuleli qembu izinto zizimbi, kodwa manje usukhona umehluko. Kukhona lapho esiya khona,” kuqhuba uMngqithi.
Lo mqeqeshi uzwakala enokuzethemba ngokuvika kwezakhe izembe nje, yingoba zinethuba lokuwacosha phansi amaphuzu uma sekuphuma isinqumo ngomdlalo ongaphelanga ngenxa yokucima kukagesi ngesikhathi zibhekene neSuperSport eLucas Moripe Stadium, e-Atteridgeville, ngoFebhuwari 23.
Abafana Bes’thende bazotholana phezulu neSekhukhune United, ePrincess Magogo Stadium, KwaMashu, ngoMgqibelo ngo-3 ntambama.