Kusemnyama kwiDurban Ladies kwiHollywoodbets Super League

KUSEMNYAMA eqenjini laKwaZulu-Natal elidlala kwiHollywoodbets Super League, iDurban Ladies, okuyilona kuphela kwawakulesi sifundazwe elisazabalazela ukunqoba umdlalo walo wokuqala kule sizini ka-2025. 

IDurban Ladies iphinde yathola isibhaxu inenebulelwa ekhaya yi-TS Galaxy Queens ngo 8-0 eSugar Ray Xulu Stadium, eClermont, ngoMgqibelo

Leli qembu eliqeqeshwa uSiphephelo “Meli” Makhaye, selishaywe emidlalweni eyisihlanu, ladlala ngokulingana kwemibili, ladlala ngokulingana kwemibili. Lihlezi emsileni kwi-log yeSuper League ngamaphuzu amabili.

IRoyal AM Ladies nayo ebisiphenduke ukudla kwenduku kwazise ishaywe emidlalweni eyisikhombisa ilandelana, iwine okokuqala iguqisa i-University of Pretoria ngo 3-2, ngeSonto.

Leli qembu elicijwa uSimphiwe Mafene, lizolwela ukunqoba umdlalo walo wesibili kule sizini uma seliibhekene neDurban Ladies emdlalweni wabakhaya baKwaZulu-Natal, ngoMgqibelo ngo-3 ntambama, eHarry Gwala Stadium, eMgungundlovu. 

Ngakolunye uhlangothi iDurban izobe ilwela ukunqoba umdlalo wayo wokuqala kule sizini kulo mdlalo wabakhaya, okwenza lo mdlalo ube kwebhekwe kakhulu ngempelasonto kwiSuper League.

IDurban Ladies ne-AM badonsa kanzima nje, elinye iqembu lakulesi sifundazwe, i-Ezemvelo Women’s FC yilona elisakhombise ukwenza kangcono selokhu kuqale le sizini. 

Nakuba Ezemvelo ithole isibhaxu sika 1-0 kwiRichmond United ngoMgqibelo, eMerino Park Stadium, eSoweto, isanqobe imidlalo emine kweyisishiyagalombili esayidlalile. Isendaweni yesishiyagalombili kwi-log.

I-Ezemvelo eqeqeshwa uRichard “‘Mrich” Zuma, ibuyela ensimini ngomdlalo wasekhaya ne-TUT Football Club, ngoMgqibelo ngo-3 ntambama, eKing Zwelithini Stadium, eMlaza.

IMamelodi Sundowns evikela isicoco seSuper League nesikhonye kulesi sigaba amasizini amahlanu elandelana, iphinde yaqhubeka nokuqhobozela amaphuzu iguqisa i-First Touch Ladies, ngoMgqibelo, e-Old Peter Mokaba Stadium, ePolokwane.

Leli qembu eliqeqeshwa uGodfrey “Godfather” Sapula, lizodlala neRichmond Unitd, ngeSonto ngo-3 ntambama, eLucas Moripe Stadium, e-Atteridgeville. 

Imiphumela yeHollywoobets Super League:

Univ. of Pretoria 2-3 Royal AM; First Touch Ladies 0-2 Mamelodi Sundowns; TUT Football 5-0 UCT; Durban Ladies 0-8 TS Galaxy Queens; Richmond United 1-0 Ezemvelo Women’s FC; UWC 1-1 JVW FC; Univ. of Fort Hare 0-0 City Lads; University of JHB 1-1 Copper Belts FC