Udliwe ngowaseLesotho umhlanganiso kowoMsinga Half-Marathon
UMEYA waseMsinga, uFelenkosini Sikhakhe ephahlwe ngabagijimi abadle umhlanganiso ku-21km no-10 kuMsinga Half-Marathon, eMsinga, izolo. Kusukela kwesokunxele uLetlatsa Nape, uNokuthula Njunguza, uNonhle Dlamini noSiyabonga Ndlovu
Image: SIBUSISO MDLALOSE
ULETLATSA Nape waseLesotho noNokuthula Njunguza waseMzumbe kwabesifazane, yibona abakhangule isicoco sebanga lika-21km emjahweni uMsinga Half-Marathon, eMsinga.
UNape weMaxed Elite udle umhlanganiso ngesikhathi esingu-1:11:38, isibili kwaba uBenjamini Nyongesa waseKenya ngo-1:11:44, isithathu kwaba uTimothy Kosgey waseKenya ngo-1:13:23.
Kwabesifazane uNjunguza we-Xcel Running Club udle umhlanganiso ngo-1:31:37, isibili kwaba uNokuthula Ntshangase weBlack Diamond ngo-1:36:12, isithathu kwaba uSilindile Biyela weRichards Bay Athletics Club ngo-1:38:39.
UNape noNjunguza bahlomule ngo-R5 000, uNyongesa noNtshangase bathola u-R4 000, uKosgey noBiyela bathola u-R3 000.
Ku-10km umhlanganiso udliwe uSiyabonga Ndlovu we-Xcel Running Club ngesikhathi esingu-32:15, kwabesifazana kwaba uNonhle Dlamini woMzimkhulu Athletics Club ngo-43:48. Bobabili uNdlovu noDlamini bahlomule ngo-R2 500 ngamunye.
Lo mjaho waminyaka yonke osukele eMabaso Secondary kwesenkosi yakwaMabaso wayophelela eSolomon Lina Sports Comple kwesenkosi yakwaMajozi, bekungokokuqala kulo nyaka kugijinywe kuwo ibanga lika-21km njengoba ibanga lika-10k no-5km kuphela.
UNape obeqala ukugijima lo mjaho, uthe kusho lukhulu kuyena ukunqoba lo mjaho, futhi uzimisele nokwenza kahle kwemine imijaho yebanga elifanayo asazoyigijima nonyaka.
“Bewungelula lo mjaho ngenxa yezintaba ezisemzileni okugijinywa kuwo, kodwa ngijabule kakhulu futhi ukunqoba kwami lo mjaho kuyangikhuthaza kakhulu ekwenzeni kahle nakweminye imijaho engisazoyigijima, okubalwa kuyona i-Absa Run Your City 10km (ezoba ngoSepthemba eGoli),” kusho uNape, ongomunye wabagijimi baseLesotho abalakhu bekhombise njalo ukuba ukwenza kahle emijahweni yakuleli yamabanga amade.
UNjunguza odle umhlanganiso kwabesifazane, uthe: “Ngizizwa ngijabule kakhulu ngokuwina lo mjaho, noma izintaba zithande ukungithwalisa kanzima kancane.
Eminyakeni emithathu ezayo ngifisa ukuzibona ngigijima umjaho webanga elide, kodwa ngizoya kancane kancane ngizilungiselela ukufinyelela kulelo zinga,” kusho uNjunguza.
UMeya woMasipala uMsinga, uFelenkosini Sikhakhane, uthe isifiso sabo njengomkhandlu ukuwubona ukhula lo mjaho wengeza namanye amabanga ugcina uba yi-marathon ngokugwele.
“Ingani engakhuli iyahlupha. Ngakho nathi njengomkhandlu sinesifiso esikhulu sokuwubona ukhula lo mjaho ufinyelela ezingeni lokuba yi-marathon ngokugcwele ngomuso.
Kodwa-ke lokho kuzoya nangokuthi sibanawo yini amandla okwenza lokho, njengoba okuningi kuya ngohlahlomali esinalo njengomkhandlu, kanti-ke njengeminye imikhandlu nathi sidonsa kanzima ngokwezezimali.
Sizahlanganisa amakhandla njengomalungu omkhandlu sibone ukuthi yikuphi esingakwenza ukukhulisa lo mjaho,” kusho uSikhakhane.
Lo mjaho bewuzinyaziswe uMandla Mngomezulu, oyiphini likamengameli weKwaZulu-Natal Athletics, nSello Mokoena, owake waba ngumengameli weKZN Athletics.
Bobabili laba baphakathi kwabazobe besokhethweni lobuholi obusha bale nhlangano oluzoba ngoJune 14.