UNene usebheke amaWorld Champs nele-relay
IQEMBU laseNingizimu Afrika elibuye nezindondo kuma-World Athletics Relays, abeseGuangzhou, eChina, ngempelasonto edlule lemukelwe njengamaqhawe esikhumulweni sezindiza, i-OR Tambo International Airport, eGoli
Image: Cecilia van Bers
UMGIJIMI waKwaZulu-Natal, uZakithi Nene, obeseqenjini le-relay laseNingizimu Afrika elishaye into ecokeme emidlalweni yeWorld Athletics Relays, eGuangzhou, eChina, ubona lo mphumela uzolikhuthaza njengoba selizibekisele indawo kumaWorld Championships.
Ithimba ebelimele elakuleli eGuanzhou, elibuye nezindondo ezintathu, lamukelwe njengamaqhawe ngoLwesithathu esikhumulweni sezindiza, i-OR Tambo International Airport, eGoli.
Aligcinanga ngokuthola izindondo emijwahweni emithathu kwemine ebeliyingenele kodwa liphinde lephula amarekhodi amabili akuleli,
Amaqembu akuleli abuye nezindondo ngelika-4x100m labesilisa, elibuye neyegolide, elika-4x400m labesilisa nalo elithole igolide, kube ngelabesifazane lika-4x400m elibuye nendondo yethusi.
Elika-4x100m ebelibophele uWayanda Walaza, Sinesipho Dambile, Bradley Nkoana no-Akani Simbine, lidle umhlanganiso kowamanqamu ngo-37.61, lihlula kancane elase-USA elishaye u-37.66.
Elabesifazane lika-4x400m libuye neyethusi liqopha isikhathi esingu-3:24:86, lenza irekhodi elisha lakuleli. Elidala bekungu-3:28:01. Belakhiwe nguShirley Nekhubui, nguMiranda Coetzee, Precious Molepo noZeney Geldenhuys.
UNene nguyena obehola iqembu lakuleli lika-4x400m elibuye nendondo yegolide ngesikhathi esingu-2:57:50, okuyirekhodi elisha laseNingizimu Afrika, licisha elika-2:58:17.
Belakhiwe nguye, uGardeo Isaacs, Udeme Okon noLeendert Koekemoer.
UNene wenze isikhathi esingu-43:63, okuyisikhathi esisheshayo emhlabeni kulo nyaka, kanti ubonakala esondela ku-43:03m okuyirekhodi lomhlaba eliphethwe uWayde van Niekerk.
AmaWorld Athletics Championship anonyaka azobanjelwa eTokyo, eJapan, ngoSepthemba.
“Yimi ogijime ekugcineni emjahweni we-relay, kodwa ngibone ozakwethu ebengijima nabo bengenzela lula umsebenzi. Besineqembu elihlanganise abagijimi abasebasha nasebenamava,” kusho uNene, odabuka eMnambithi.
“Ngijabule kakhulu ngesikufezile njengeqembu, ngilangazelele kakhulu ukuphinda ngigijime nabo ozakwethu eTokyo nakuma-Olympic ka-2028.”
Abagijimi abaningi bakuleli bazophinde babonakale ochungechngeni lweWanda Diamond League oluqhubekayo emadolobheni awu-15 ehlukene emhlabeni ngesikhathi besazicijela amaWord Championship.