OweDurban City ayimthusi eyokumangalelwa kwi-PSL ngomdlali

AKUDIKIZI nqulu kusihlalo weDurban City, uFarook Kadodia, ngecala ababhekene nalo njengoba bebheke umdlalo omqoka abazowudlala neCape Town Spurs wokusonga isizini yeMotsepe Foundation Championship kusasa ngo-3 ntambama e-Athlone Stadium, eKapa. 

Kusasa kuzodlalwa imidlalo yokugcina yokusonga isizini yalesi sigaba okubhekwe ukuthi icacise ngeqembu elizowina iligi, likhushulelwe esigabeni seBetway Premiership.

Amabili azoqeda endaweni yesibili neyesithathu azothola ithuba lokuyodlala kweyokuhlunga nelizoqeda endaweni ka-15 kwiPremiership. 

ICity, eqhwakele kwi-log yeChampionship ngamaphuzu angu-55, idinga iphuzu kulo mdlalo wakusasa ukuze ibe ngompetha inyukekele kwiPremiership.

Isadliselwe ogageni yi-Orbit College, esendaweni yesibili ngamaphuzu angu-52. Yona izovala neLeruma United, esivele idliwe yizembe, emdlalweni ozoba se-Olympia Park Stadium, eRustenburg, ngesikhathi esifanayo. 

Nokho, ngoLwesine i-Premier Soccer League (PSL) ikhiphe isitatimende esiveza ukuthi ngeke iyikhiphe indebe okufanele imukeliswe iqembu elizoba ngompetha beligi kusasa ngenxa yokuthi kunamacala asetafuleni layo okungenzeka umphumela wawo uyishintshe indlela i-log eyiyona. 

Leli cala kuthiwa ngelokuthi umdlali wasesiswini, uSaziso Magawana, wajoyina iCity ngaphandle kwamaphepha aqondile ngesikhathi esuka kwiMarumo Gallants ngaphambi kokuqala kwesizini.

Lokhu kuchaza ukuthi ngisho iCity ingawina kusasa, kodwa ngeke ijabule kwazise izinto zisengashintsha. I-PSL kulindeleke isikhiphe ngoLwesibili isinqumo saleli cala. 

“Akusikhathazi nakancane lokho ngoba siyazi ukuthi asinacala. Sakwenza konke okufanele ngokusayinisa uMagawana kuleli qembu. Into nje ekhona yile yokuthi kunabathize abazama ukusakhela itulo lokusiphazamisa singakhuphukeli kwiBetway Premiership, kodwa amathe azobuyela kwasifuba," kusho uKadodia.

"Engingakusho ukuthi phansi amaphaphu kubalandeli bethu, bangakhathazeki iqembu labo limsulwa futhi maduze bazojabulela ukukhushulelwa kwalo kwiPremiership.” 

Ukunyuka kweCity kubhekwe ngabomvu KwaZulu-Natal, kwazise kuzobuyisela isibalo kwamane amaqembu aqhamuka kusona adlala kwiPremiership kulandela ukushabalala kweRoyal AM. 

Imidlalo yeMotsepe Foundation Championship: 

Kusasa - Ngo-3pm:

Kruger United v Venda FC (Kanyamazane Stadium); Cape Town Spurs v Durban City (Athlone Stadium); Casric Stars v Hungry Lions (Solomon Mahlangu); Black Leopards v Univ. of Pretoria (Thohoyandou Stadium); Milford FC v Baroka FC (Princess Magogo Stadium); Pretoria Callies v JDR Stars (Dobsonville Stadium); Upington City v Highbury (Mxolisi Dicky Jacobs); Orbit College v Leruma United (Olympia Park)