OweZemvelo akumethusi ukuyobhekana neSundowns

UMQEQESHI we-Ezemvelo Women’s FC, uRichard “Mrich” Zuma, akafuniseli ngaphokophelele ukukufeza naleli qembu ngesizini yalo yokuqala esigabeni esiphezulu sebhola labesifazane kuleli, iHollywoodbets Super League. 

Ezemvelo ezingomakoti kule ligi kulandela ukudla umhlanganiso kumaPlay-Offs kazwelonke eSafa Sasol League ngesizini edlule, ziyiqale ngebatha isizini yazo zibingelelwa ngesibhaxu sika 3-2 yi-JVW FC, zaphinde zanenebulwa ngo 6-1 yi-University of Johannesburg. 

Nokho, leli qembu laseMlaza, eThekwini, likwazile ukuziqoqa ngomdlalo walo wesithathu libuya namaphuzu amathathu ekuhambeni ngempelasonto edlule, ngokuguqisa iCopperbelt Ladies FC ngo 2-0 eSeshego, eLimpopo. 

Libuyela ensimini ngomunye umdlalo wasekuhambeni neMamelodi Sundowns Ladies, ngoMgqibelo ngo-3 ntambama, eLucas Moripe Stadium, e-Atteridgeville. 

“Ukuthola kwethu iwini yokuqala sishaya iCopperbelt kube yinjabulo kimina nakubadlali bami, okuyinto ebebeyidinga kakhulu ukwenyusa izinga lokuzethemba. 

"Indlela abadlala ngayo manje iyakhombisa ukuthi sebeyasibamba isitayela sami, okuyile ndlela engifuna badlale ngayo. Osekusele ukuthi siqhubeke nokubamba umgqigqo nasemidlalweni elandelayo,” kusho uZuma. 

Lo mqeqeshi uthathe izintambo zokuqeqesha leli qembu ngaphambi kokuqala kwale sizini. Ukholwa wukuthi ngabadlali anabo, abahlanganisa abanamava nabasebencane abasalambele impumelelo ebholeni, akufanele abe nokubangabaza ekulweleni ukunqoba isicoco seSuper League.

Leli qembu libophele abadlali abanamava okubalwa kubo uZamandosi Nene, owayaziwa ngoCele engakashadi, noSilindile “Mshana” Ngubane, okungabadlali abazakhela igama eqenjini lesizwe, iBanyana Banyana, eminyakeni edlule. 

Ebuzwa ngokuyobhekana neSundowns, uZuma uthe akaboni kufanele abadlali bakhe babe novalo ngokuyobhekana naleli qembu.

“Ngifuna abadlali bami bakususe emiqondweni yabo ukuthi bayobhekana neSundowns enzima, kodwa bazitshele ukuthi bayodlala umdlalo obalulekile njengayo yonke abasazoyidlala kule sizini. Bangathuswa yigama leSundowns," uqhube kanje.

ISundowns, esiqeqeshwa nguGodfrey “Godfather” Sapula, isikhonye amasizini amahlanu kwiSuper League idla izicoco zeligi. Iyinqobile imidlalo emibili esayidlalile kule sizini. 

Imidlalo yeHollywoodbets Super League kule mpelasonto:

NgoMgqibelo: Royal AM v Copperbelts FC (1pm - Harry Gwala Stadium), University of Western Cape v Richmond United (1pm  - UWC Stadium), Mamelodi Sundowns v Ezemvelo Women's FC (3pm - Lucas Moripe Stadium), City Lads v University of Cape Town (3pm - Osaac Wolofosn Stadium), University of Fort Hare v Durban Ladies (3pm - Davidson Stadium).

NgeSonto: JVW FC v TS Galaxy Queens (11am - UJ Soweto Stadium), First Touch v University of Pretoria (1pm - Old Peter Mokaba Stadium), University of Johannesburg v TUT Football Club (3pm - UJ Soweto Stadium).