Amajita ethubeni lokuzibekisela indawo kwiNdebe yoMhlaba ka-Under 20

IQEMBU lesizwe lakuleli lika-Under 20, Amajita, lidinga ukunqoba iDemocratic Republic of Congo (DRC) kuma-quarterfinal e-Africa Cup of Nations (Afcon) Under-20, e-Egypt, ukuze lizibekisele indawo kwiNdebe yoMhlaba yeFifa U-20. 

Amajita azotholana phezulu neDRC kowama-quarterfinal e-Afcon Under-20, namuhla (ngoMsombuluko) ngo-8 ebusuku, eSuez Canal Stadium, e-Ismailia.

Ukudlala ngokulingana ngo 1-1 neZambia ngoLwesihlanu yikho okuwelise Amajita angena quarterfinal, aqeda esicongweni kuGroup A abeboshelwe kuwo neSierra Leone, Egypt, Zambia neTanzania.

Amaqembu amane azodlulela kweyandulela owamanqamu, azomela i-Afrika kwiNdebe yoMhlaba yeFifa U-20 eChile ngoSepthemba 27 kuya ku-Okthoba 19. 

Amajita aholwa ngumqeqeshi, uRaymond Mdaka, ayiqale ngebatha i-Afcon eguqiswa ngo 1-0  ngosokhaya i-Egypt kowokuvula. Avuke azithatha, avulela isibhaxu sika 1-0 kwi-Tanzania, alandelisa ngesika 4-1 kwiSierra Leone. 

Phezu kokuba uMdaka engabatholanga abanye abadlali abamqoka, okubalwa kubona uMbekezeli “TLB” Mbokazi we-Orlando Pirates obedlala kowamanqamu weNedbank Cup ngempelasonto edlule kodwa Amajita akhombisa ukuba ngelinye lamaqembu angayiwina i-Afcon. 

UMdaka ohole Amajita ngempumelelo edla isicoco seCosafa U-20 Challenge Cup nyakenye eMozambique, unenselelo yokubuyisela leli qembu kwiNdebe yoMhlaba elagcina ukuyidlala ngo-2019, ePoland, lapho laphuma khona esigabeni samaqoqo. 

Iqembu lakuleli lika-Under 20 elalidlala okokuqala kulo mqhudelwano ngo-1997, lafinyelela kowamanqamu laguqiswa ngosokhaya iMorocco ngo 1-0. Kwathi ngo-2009, 2017 no-2019 lafinyelela kweyandulela owamanqamu. 

Isiyonke imidlalo yama-quarterfinal e-Afcon U-20: 

Namuhla - Ngo-2pm: Nigeria v Senegal (Suez Canal Stadium); Ngo-5pm: Morocco v Sierra Leone (30 June Stadium); Ghana v Egypt (New Suez Stadium); Ngo-8pm: South Africa v DR Congo