Isingene ngonyawo olulodwa iDurban City kwiPremiership
UJOSLIN Kamatuka noSaziso Magawana beDurban City bejabulela elinye lamagoli abanqobe ngawo ngo 3-2 iBlack Leopards koweMotsepe Foundation Championship, eChatsworth Stadium, eThekwini, ngeSonto
Image: BACKPAGEPIX
Durban City (1) 3
Black Leopards (0) 2
IDURBAN City isingene ngonyawo olulodwa kwiBetway Premiership kulandela ukuguqisa kwayo iBlack Leopards emdlalweni weMotsepe Foundation Championship obuseChatsworth Stadium, eThekwini, ngeSonto ntambama.
Amagoli eCity avalelwe phakathi nguSamkelo “Shikisha” Maseko ngesiwombe sokuqala. UJoslin Kamatuka noSaziso Magawana bawashaye ngesesibili.
AweLeopards ashaywe nguTshepo Matsinini ngesiwombe sesibili.
ICity esiqhwakele isikhathi eside esicongweni se-log yeMotsepe Championship beyize kulo mdlalo idinga amaphuzu amathathu ukuze izozibeka ethubeni lokunqoba isicoco seligi. Ezithendeni zayo kukhona i-Orbit College eguqise i-JDR Stars ngo 2-0 eSoshanguve Stadium, ePitoli.
ICity isesicongweni se-log ngamaphuzu angu-55, i-Orbit isendaweni yesibili ngangu-52.
Yize i-Orbit nayo inqobile kwi-JDR kodwa izinto zivuna kakhulu iCity ngesicoco seligi njengoba isidinga iphuzu emdlalweni wokugcina ezowudlala neCape Town Spurs ngeSonto, eKapa.
I-Orbit kumele ithandazele ukuthi iCity ishaywe yiSpurs, yona ihlohle amagoli angu-10 kwiLeruma United emdlalweni wokugcina. Ngakolunye uhlangothi, wumqansa ongakhwelwa mbongolo kwi-Orbit enamagoli angu-33. ICity inamagoli angu-43, i-Orbit isishaye angu-33 kule sizini.
Uma i-Orbit yehlulekile ukuwina iligi ngosuku lokugcina, izothola elinye ithuba emidlalweni yama-Play Off ezoyidlala neqembu elizoqeda endaweni yesithathu nelizoqeda kweka-15 kwiBetway Premiership.
Ukunyuka kweCity ebiyaziwa ngeMaritzburg Unites kuzoba yizindaba ezinhle ikakhulukazi kubalandeli baseChatsworth abebeququdwa yindlala yebhola kusukela kwashabalala iManning Rangers eyayidlalela eChatsworth Stadium.
IRangers eyaba yiqembu lokuqala eladla isicoco sePremiership ngesizini ka-1996/97, yagawulwa yizembe ngesizini ka-2005/05, yagcina ngokudayiswa.
Imiphumela yeMotsepe Foundation Championship:
Baroka 1-2 Pretoria Callies; Highbury 1-0 Kruger United; Hungry Lions 1-1 CT Spurs; Venda 1-1 Casric Stars; Leruma 1-1 Milford; Durban City 3-2 Black Leopards; JDR Stars 0-2 Orbit College;