OwePrince Mangosuthu nesifiso sokufinyelela komjaho ezingeni lomhlaba
U-ONALENNA Khonkhobe (ophakathi) ongumpetha wanonyaka wePrince Mangosuthu Ultra Marathon ebangeni lika-52km, ephahlwe yiMeya kaMasipala wesiFunda uMzinyathi, uThembisile Mchunu noDkt Buthelezi oyisihlobo seNkosi uZuzifa Buthelezi
Image: UMZINYATHI DISTRICT FACEBOOK
ONGUSIHLALO weBiggersberg Athletics Club ehlela iPrince Mangosuthu Ultra Marathon, uSiyabonga Ngobese, uveze isifiso sakhe esikhulu sokubona lo mjaho ufinyelela ezingeni leminye yemijaho yakuleli esezingeni lomhlaba kwezokugijima.
Phakathi kwemijaho yakuleli esezingeni le-World Athletics Label, kubalwa i-Two Oceans Marathon, Soweto Marathon, Durban International Marathon, neCape Town Marathon yona esisezingeni leGold Label.
Lo mjaho waminyaka yonke ogijinywa phakathi kweNquthu neDundee, uya ngokuya ukhombisa ukudlondlobala njengoba usuheha nabagijimi abasezingeni eliphezulu.
Uhlanganisa ibanga lika-52km, 10km no-5km. Wasungulwa ngo-2011 usabizwa ngoMzinyathi Ultra Marathon, nokwathi ngo-2019, wabe usuqanjwa kabusha ngePrince Mangosuthu Marathon ngenhloso yokuhlonipha inkosi uMangosuthu Buthelezi owayengundunankulu kaZulu nomsunguli we-IFP.
Emjahweni wanonyaka ebangeni lika-52km obewehla kusukwa eNquthu kubhekwe eDundee, umhlanganiso udliwe u-Onalenna Khonkhobe weNedbank Running Club, isibili sathathwa u-Ayanda Ngcobo we-Xcel Running Club, isithathu kwaba uSiboniso Sikhakhane we-Entsika Athletics Club olale isithathu.
Kwabesifazane ubhedu ludliwe nguShelmith Muriuki waseKenya, obesewunqoba okwesithathu iminyaka ilandelana, isibili kwaba uJenet Mbhele, isithathu kwaba uNeviah Maganzo waseZimbabwe.
Abadle umhlanganiso kulo mjaho bahlomule ngo-R150 000 kwabesifazane nabesilisa, kwabathathe isibili kwaba ngumthobanhliziyo ka-R50 000.
“Siyawufisa nathi lo mjaho wethu ube sezingeni lomhlaba, ube ne-label njengeminye imijaho yamabanga amade ekhona eNingizimu Afrika, okuzoholelela ekutheni abagijima kuwo bathole amaphuzu azobenza babalwe ezingeni lomhlaba nabagijimi abenza kangcono," kusho uNgobese.
"Ukubamba iqhaza kulo mjaho kwabagijimi abanjengoKhonkhobe, oseke wanqoba i-Two Oceans neSoweto Marathon, kuyinkomba yokuthi lo mjaho uyakhula kakhulu.
"NeKenya isinike abagijimi abasezingeni eliphezulu kwabesifazane, okuyingakho nginethemba lokuthi lo mjaho wethu uyogcina ufinyelele ezingeni le-label uma siqhubeka nokusebenza ngokuzimisela nokukhandla ekuwuhleleni.”
IPrince Mangosuthu ibalwa neminye imijaho esetshenziswa ngabagijimi ukuzibekisela indawo emjahweni omkhulu kunayo yonke kuleli, i-Comrades Marathon, ezogijinywa ngoJuni 8.