Kubhekwe uLeeto noBekele kwiDurban International yanonyaka

KUBHEKWE umgijimi wakuleli, uMathews Leeto noBerhanu Teshom Bekele, wase-Ethiopia emjahweni iDurban International Marathon webanga lika-42.2km ozogijnywa kusasa kusukela ngo-6.30 ekuseni kusukwa eProspecton Road uze uyophelela ePeople’s Park, ngaseMoses Mabhida Mabhida Stadium, eThekwini. 

Lo mjaho waminyaka yonke owasungulwa ngo-2021 ubalwa nemijaho yakuleli esezingeni  lomhlaba, ngaphansi kwe-World Athletics Label.

Uya ngokuya udlondlobala njengoba uheha abagijimimi abasezingeni eliphezulu nabaliqhamukisa emazweni angaphandle kwakuleli.

Nyakenye umhlanganiso udliwe u-Elroy Gelant wakuleli ngesikhathi esingu-2:09:32, isibili sathathwa uLeeto ngesikhathi esingu-2:09:47. 

Kwabesifazane umhlanganiso udliwe uCian Oldknow wakuleli ngesikhathi esingu-2:29:46, isibili kwaba u-Ethel Pangiso waseZimbabwe ngesikhathi esingu-2:53:38.

Bobabili uGelant no-Oldknow abenze ezibukwayo kulo mjaho bephula amarekhodi, bathole ingqayizivele yethuba lokuyogijima kuma-Olympic Games, eParis, eFrance nyakenye. 

Nokho insephe uGelant osanda kuphula irekhodi laseNingizimu Afrika lika-2:05:36sec kwiHamburg Marathon yebanga lika-42.2km, eGermany, ngeSonto eledlule, akezukuba yingxenye yomjaho wanonyaka. 

Lokho kwenza kubhekwe uBekele othelwe ngezibonkolo ngemuva kokulala isibili emjahweni iPyongyang International Marathon webanga lika-10km, eNorth Korea ngo-Ephreli 6. 

Ngaphandle kukaBekele, kubhekwe uLeeto olale isibili nyakenye, uTumelo Motlagale wakuleli olale endaweni yesishiyagalombili nyakenye, noReghen wakuleli othathe indawo yeshumi nanye nyakenye. 

Ukulimala kuka-Oldknow nokungabi bikho kukaPangiso no-Amena Worke Degu olale isithathu nyakenye, kwenze kube nzima ukuqagula ukuthi ngubani ongase adle umhlanganiso kwabesifazane nosekusho ukuthi sekuyobonakala ngalo usuku lomjaho sezidlana imilala. 

Umgijimi ozodla umhlanganiso uzokhala emuke no-R75 000 kwabesilisa nabesifazane, isibili kube kube ngu-R40 000, isithathu kube ngu-R15 000. 

Lo mjaho odlondlabalayo uyisendlalelo somjaho omkhulukazi iComrades Marathon yebanga lika-89.98km ezosuka eMgungundlovu iphelele eThekwini ngoJuni 8.