Bathembisa imiklomelo econsisa amathe kwi-Best of the Best ka-2026
OYIPHINI le-Chancellor yase-DUT, uDkt Vuyo Mthethwa, ephahlwe nguMthoko Khuzwayo weRavens Athletics Club, uBongani Yengwa oyiMenenja yezeMidlalo eDUT, uThabani Mhlongo ongumqondisi weReal Estate Management eDUT, noSteven Mkhize ongumqondisi osabambile weLogistical Services eDUT
Image: DUT PICTURE
UMJAHO waminyaka yonke webanga elide, iBest of the Best Marathon, uzobalwa nemijaho econsisa amathe kubagijimi ngenxa yemiklomelo ezohlonyulwa.
- Lokhu kuvezwe nguMthoko Khuzwayo ongusihlalo weRavens Athletics Club, engabahleli balo mjaho, emcimbini obuseDurban University of Technology (DUT), eThekwini.
Lona bekungumcimbi wokubonga ubudlelwano bokusebenzisana phakathi kwesikhungo semfundo ephakeme i-DUT nabahleli balo mjaho, nabo bonke ababambe iqhaza empumelelweni yawo.
Bekungokokuqala nonyaka abeBest of the Best Marathon bengena ebudlelwaneni bokusebenzisana nesikhungo semfundo ephakeme, i-DUT.
“Emjahweni wangonyaka ozayo kukhulu okuzayo, noma ngingeke ngisheshe ngikuveze.Kuningi esesikuhlelile, nesisakuhlela. Ngo-2026 sihlose ukuba nabagijimi abangu-10 000 abazobamba iqhaza kulo mjaho.
Ngingakuqinisekisa ukuthi imiklomelo yomjaho wangonyaka ozayo izobe imihle kakhulu, iconsisa amathe, ngoba sifuna ukwenza ushintsho empilweni yabagijimi ngokuthi siyiphindaphinde,” kusho uKhuzwayo.
Lo mjaho okhula ngesivinini ohlanganisa ibanga lika-42km, elika-21km nelika-10km, ungomunye wemijaho yokwenza izikhathi kubagijimi zokuzibekisela indawo kwiTotalsports Two Oceans Marathon neComrades Marathon.
Emjahweni wanonyaka abagijimi abadle umhlanganiso ku-42km bahlomule ngo-R15 000 kwabesilisa nabesifazane. Kwelika-21km abaphume phambili bahlomule ngo-R4 000, ku-10km kwaba ngu-R2 500
Owanonyaka obungoMashi, ebangeni lika-42km umhlanganiso udliwe nguSiyabonga Mafuleka, kwabesifazane wadliwa nguRholexe Kogo waseKenya.
UDkt Vuyo Mthethwa, oyiphini likaChancellor waseDUT, uthe isifiso sabo esikhulu njengesikhungo ngukubona abafundi bakulesi sikhungo besheba imfundo, bevelela nakwezemidlalo.
“Ukusebenzisana kwethu neBest of the Best Marathon kube yimpumelelo enkulu. Besinovalo ngoba njengesikhungo i-DUT besingakaze siyenze le nto.
Kodwa lobu budlelwano bethu nabo busizuzise kakhulu ngokuthi sikwazi ukunika abafundi bethu ithuba lokusheba imfundo yasekilasini nezemidlalo, ikakhulukazi njengoba sinemikhakha eminingi ephathelene nezemidlalo kulesi sikhungo,” kusho uDkt Mthethwa.
Ube esekuqinisekisa ukuthi abagijimi abangu-21 bakulesi sikhungo abangaphansi kweDUT Athletics Club bazongenela iComrades Marathon yanonyaka ezoba ngoJuni 8, kusukwa eMgungundlovu kubhekwe eThekwini. Lokhu kuhambisana nokugubha iminyaka engu-21 kwasungulwa lesi sikhungo.
“Sifuna ukuthi ikilabhu yethu, i-DUT Athletics Club, ihehe abagijimi njengoba kuyikilabhu ebingaziwa phambilini, okuyingakho sizosebenzisa izindlela ezithize zokudoba abagijimi ukuba bayijoyine, okubalwa kuzo ama-tracksuit nemali ezohlonyulwa yilabo abenze kahle emjahweni, yize kungeke kube yimali elinganayo neyomqhudelwano uqobo.”