INHLANGANO ehlela umjaho, iComrades Marathon Association (CMA), ithathe elinye ingxathu lokunaka izimvo zabagijimi ngokuqoka ikomiti elizoba ngumxhumanisi phakathi kwayo nabasubathi.
I-Athlete Sub-Committee enamalungu ayisihlanu, ibunjwe ngabagijimi nezinkakha kwezokusubatha zezinhlanga ezahlukene. Usihlalo waleli komiti nguWillie Mtolo owaphuma endaweni yesibili kwiComrades ngo-1989, futhi osebhodini yeCMA evotelwe ezinyangeni ezedlule. Amanye amalungu akuleli komiti nguBrenda Marolen oyiphini likaMtolo, Ludwick Mamabolo, Gift Kelehe, Kerry Koen, Lesiea Ramatema, Cuan Walker, Busi Xulu,Jared Williams noXoliswa Mthembu.
UKelehe wazakhela igama ewina iComrades ngo-2015, kanti uMamabolo washaya intambo ngo-2012.
Kungokokuqala ukuthi iCMA ihlanganise ikomiti elizobhekela izikhalo zabagijimi nokuthola izimvo zabo ngaphambi kokuthathwa kwezinqumo kwiComrades. Ngaphezu kwalokho, lizodlulisa imibono yabagijimi mayelana nokuphuculwa komjaho kusukela bebhalisa kuze kuba sekugcineni kwawo.
Ikomiti lizosebenza ngokubambisana nebhodi yeCMA ukuqinisekisa ukuthi izwi labasubathi liyezwakala kule nhlangano.
UMtolo uthe: "Sijabule ngokwethulwa kweComrades Marathon Athlete Sub-Committee. Lesi sinyathelo sifakazela ukuzinikela kwethu ekuthuthukiseni abagijimi nokufaka umoya wokwesekwa kubona bonke abagijimayo."
Umjaho iComrades Marathon wanonyaka uzoba ngoJuni 8. Uzosuka eMngundlovu uphele eThekwini.
Related Topics: