I-Arrows nenselelo yokugcina umgqigqo kowabakhaya naMaZulu
UMQEQESHI weGolden Arrows, uManqoba Mngqithi, nokaputeni wakhe uGladwin Shitolo, banenselelo yokuqhubeka nomgqigqo wakamuva ngomdlalo wabakhaya naMaZulu FC kusasa
Image: BACKPAGEPIX
INENSELELO yokuqhubeka nomgqigqo wakamuva iLamontville Golden Arrows ezotholana phezulu naMaZulu FC emdlalweni wabakhaya baseThekwini, namuhla ntambama.
Abafana Bes'thende noSuthu bazodudulana kowabakhaya kwiBetway Premiership, eMpumalanga Stadium, eHammarsdale, ngo-3pm.
I-Arrows esendaweni ka-11 ngamaphuzu angu-29 kwi-log yePremiership. Ihlukaniswe ngamaphuzu amane naMaZulu asendaweni yesikhombisa ngangu-33. Isenethuba lokulwela ukungena kwiTop 8 njengoba isasalelwe yimidlalo eyisithupha ngaphambi kokusonga isizini.
Yize emidlalweni emibili yakamuva yehlulekile ukubuya namaphuzu aphelele, idlala ngokulingana neChippa United neMarumo Gallants, kodwa emidlalweni emihlanu yakamuva ikwazile ukubuya namaphuzu ayisishiyagalombili, yanqoba emibili.
Ngaphansi komqeqeshi uManqoba Mngqithi, othathe izintambo ngoMashi, Abafana Bes’thende basakhombise izimpawu zokuba yiqembu eliya ngokuba ngcono nelibukeka lingagcina likwazile ukuzibekisela indawo kwiTop 8, liqede ishobolo lokuqeda endaweni yesishiyagalolunye amasizini amathhathu elandelalana.
UMngqithi nguyena mqeqeshi osanqobele leli qembu isicoco emlandweni walo kwiPremier Soccer League (PSL) ngeMTN 8 ayidla nalo ngesizini ka-2009/10.
Bayobhekana noSuthu olulahle amaphuzu emidlalweni emibili yakamuva ilandelana, nokubanika ithuba lokufaka usawoti esilondeni kuleli qembu eliqeqeshwa ngu-Arthur Zwane, onengcindezi enkulu yokusiza leli qembu ekuqiniseni indawo kwiTop 8.
La maqembu eza kulo mdlalo wabakhaya nje, Abafana Bes’thende yibona abathwelwe ngeqoma ngokwefomu yabo yakamuva.
Yize emzuliswaneni wokuqala wale sizini zibambane ngo 0-0, kodwa isebe ngugingqigongqo eyabakhaya phakathi kwala maqembu.
Emzuliswaneni wokuqala ngesizini edlule, Usuthu luvulele isibhaxu sika 3-1, kowomzuliswano wesibili, Abafana Bes’thende babuyisa izinduku ngawo u 3-1 kowokugciina wesizini.
Ngakho owakusasa ubhekwe ngabomvu ukuthi uzowela ngakuphi phakathi kwala maqembu alwela ukuzibekisela indawo kwiTop 8 ngokuphela kwesizini.
Ngemuva kowakusasa, Abafana Bes’thende bazosalelwa yimidlalo eyisithupha emqoka okubalwa oweStellenbosch FC ekhaya, i-Orlando Pirates ekhaya, iRichards Bay FC ekuhambeni, neSekhukhune United ekhaya, okuyimidlalo engelula neze.