OwePirates ufuna baqhubeke nokuncishana ngamagoli
IZITOBHA ze-Orlando Pirates uNkosinathi Sibisi noMbekezeli Mbokazi, ezisheshe zajwayela ukuyibamba ndawonye odongeni lwasemuva
Image: BACKPAGEPIX
UKUQINA kodonga lwakhe lwasemuva yikho okwenza kuthi gidi isibindi kumqeqeshi we-Orlando Pirates, uJose Riveiro, obona ezakhe zinethuba lokunqoba izicoco ezintathu ezisasele kule sizini.
IPirates isanda kuzibekisela indawo kowamanqamu weNedbank Cup ngokuguqisa iMarumo Gallants ngo 1-0 kowandulela owamanqamu ngempelasonto.
Emidlalweni eyisithupha yakamuva emiqhudelwaneni ehlukene, eZimnyama zingenelwe yigoli elilodwa kuphela, elangena ziguqisa iMamelodi Sundowns ngo 2-1 koweligi ngoMashi 16.
Ukuqina kodonga lweZimnyama kuzophinde kuvivinyeke emlenzeni wokuqala wowandulela owamanqamu weChampions League lapho bezobhekana khona nePyramids yase-Egypt, ngoMgqibelo ngo-6 ntambama, e-FNB Stadium, eNasrec.
Ukudlula kwePirates ngegoli elilodwa emzuliswaneni odlule weChampions League, nokudlula kweMamelodi Sundowns ngendlela efanayo ibhekene ne-Esperance yaseTunisia, kukhombise ubumqoka bokuqina emuva kulo mqhudelwano.
“Ukungangenelwa goli imidlalo ilandelana, nokuthola amagoli ngokushaya ama-free kick, kwenyusa izinga lokuzethemba ngale miphumela. Kubalulekile ukungangenelwa ngamagoli, ikakhulukazi uma uneqembu elinabadlali abaseqophelweni eliphezulu nabakwaziyo ukushaya amagoli," kusho uRiveiro.
"Angisho ukuthi ukungangenelwa goli kuyisiqinisekiso sokuwina, kodwa ayakhuphuka amathuba okunqoba imidlalo uma uvimba izitha zingawashayi amagoli. Umdlalo nomdlalo esizowudlala sizowuthatha njengowamanqamu."
URiveiro uselushintshe kaningi udonga lwasemuva kulandela ukulimala kwezitobha zakhe ngokushintshana kule sizini, okubalwa kuzona u-Olisa Ndah, Thabiso Sesane, Thabiso Lebitso noThabiso Monyane abangakabuyi.
Ukuvala kweqembu lakhe emuva emidlalweni yakamuva kubukeka kuqondana nokukhushulelwa esikimini esikhulu kukaMbekezeli Mbokazi, esuka eqenjini elincane le-DStv Diski Challenge, osekhombise ukudlala ngokuzwana kakhulu noNkosinathi Sibisi maphakathi.
URiveiro, osanda kuphumela obala ngokushiya kwakhe kuleli qembu laseSoweto ekupheleni kwale sizini, unenselelo yokulivalelisa ngokulinqobela isicoco seChampions League. Le ndebe iyona elangazelelwe kakhulu yileli qembu njengoba selizame amahlandla amaningi ukulwela ukuthola inkanyezi yesibili elayithola okokuqala ngo-1995.