Abaqeqeshi baseMzansi bazobanga indawo kowamanqamu weCaf
UMQEQESHI weStellenbosch FC, uSteve Barker.
Image: BACKPAGEPIX
UMLENZE wokuqala womdlalo owandulela owamanqamu weCaf Confederation Cup phakathi kweSimba SC neStellenbosch FC uzoba yingqophamlando, hhayi emaqenjini athintekayo kuphela, kodwa nasebholeni laseNingizimu Afrika njengoba abaqeqeshi ababili bakuleli, uSteve Barker noFadlu Davids, bezotholana phezulu.
Umlenze wokuqala uzobanjelwa e-Amaan Stadium, eZanzibar, kusasa ngo-3 ntambama.
UBarker, owazakhela igama efaka i-University of of Pretoria esigabeni esiphezulu sebhola lakuleli ngo-2012, waqala ukuqeqesha iStellies esigabeni sesibili ngo-2017, nalo leli qembu walikhuphulela kwesiphezulu ngo-2019.
Kusukela lapho, useliphendule elinye lamaqembu ahamba phambili kuleli ngokuthatha isicoco seCarling Knockout ngo-2023, waphinde walibeka endaweni yesithathu kwi-log ekupheleni kwesizini ka-2023/24, nokwalinikeza igunya lokudlala kwiConfederation Cup kule sizini.
IStellies, edlala okokuqala kulo mqhudelwano, ibambane ngo 0-0 nezinkunzi zase-Egypt, iZamalek ekhaya kuma-quarterfinal, ngaphambi kokunqoba umlenze wesibili eCairo ngo 1-0.
Ngakolunye uhlangothi, uFadlu Davids, owaqala ukuqeqesha esigabeni esiphezulu kwiMaritzburg United, unikezwe izintambo zokuqeqesha iSimba yaseTanzania ekuqaleni kwesizini.
Ngaphambi kwalokho, usebenze isikhathi eside eyiphini lomqeqeshi waseGermany, uJosef Zinnbauer, kwi-Orlando Pirates, eqenjini laseRussia iLokomotiv Moscow nelaseMorocco iRaja Casablanca.
UMQEQESHI weSimba SC, uFadlu Davids.
Image: BACKPAGEPIX
UDavids usephinde wayiqinisa iSimba njengoba ivuke umbhejazane yagudluza iqembu lase-Egypt, i-Al Masry, kuma-quarterfinal. Nakuba yathelwa phansi ngo 2-0 ekuhambeni emlenzeni wokuqala, ikwazile ukuvuka izithathe kowesibili inqoba ngendlela efanayo, ngaphambi kokudlula ngo 4-1 sekukhahlelwa amaphenathi.
Kuzobe kuqala ukuthi abaqeqeshi baseNingizimu Afrika bahlangane kowandulela owamanqamu emqhudelwaneni weCaf. Lokhu kugcizelela ukuthi elakuleli aligcini ngokukhiqiza abadlali asesabalele kuleli zwekazi naphesheya kuphela, kodwa linabo nosomaqhinga asebekwazi ukulwela izicoco ezinkulu kuleli zwekazi.
Kwabanye abaqeqeshi baseNingizimu Afrika asebeyibekile induku ebandla emiqhudelwaneni yeCaf kubalwa uPitso Mosimane, owanqoba iChampions League neMamelodi Sundowns neqembu lase-Egypt, i-Al Ahly.
UManqoba Mngqithi noRhulani Mokwena nabo bafinyelela kweyandulela owamanqamu ngesikhathi besahola iSundowns.
URoger De Sa wafinyelela kowamanqamu weChampions League ne-Orlando Pirates ngo-2013, kwathi u-Eric Tinkler wayisa leli qembu kowamanqamu weConfederation Cup ngo-2015.
UGavin Hunt wafaka iKaizer Chiefs kowandulela owamanqamu eChampions League ngo-2021 kodwa waxoshwa ungakafiki. Ebhentshini kwagcina sekuhlezi u-Arthur Zwane noDillon Sheppard ngenxa yokuthi umqeqeshi owayeqokiwe, uStuart Baxter, wayesalinde imvume eyayizomgunyaza ukuthi asebenze.
Umlenze wesibili phakathi kweStellies neSimba uzodlalelwa eMoses Mabhida Stadium ngeSonto elizayo, ngo-Ephreli 27.