Kushabalale amathemba ngendondo kwi-marathon kwabaseMzansi kugiya owase-Ethiopia
UTAMIRAT Tola wase-Ethiopia ephula irekhodi le-marathon yebanga lika-42km kuma-Olympic Games, eParis, eFrance, ngoMgqibelo Isithombe: OLYMPIC GAMES X
KUPHINDE kwabheda kubagijimi baseNingizimu Afrika abebebhekiwe kwi-marathon kuma-Olympic Games, bengaliboni elidlalayo emjahweni webanga lika-42km, onqotshwe nguTamirat Tola wase-Ethiopia, ngoMgqibelo eParis, eFrance.
UTola (32) uhlabane ngegolide ngokuqopha irekhodi elisha le-marathon yabesilisa kuma-Olympic eshaya isikhathi esingu-2:06:26, ephula irekhodi lika-2:06:32 elabekwa wuSamuel Wanjiru waseKenya ngo-2008, eBeijing, eChina.
Isibili sithathwe nguBashir Abdi waseBelgium ozuze isiliva ngesikhathi esingu-2:06:47, isithathu kwaba wuBenson Kipruto waseKenya ozuze ithusi ngesikhathi esingu-2:07:00.
UTola obe ngumgijimi wesihlanu wase-Ethiopia emlandweni ukudla umhlanganiso kwi-marathon kuma-Olympic kusukela ngo-1960, unqoba lo mjaho nje, nyakenye wanqoba iNew York City Marathon.
INingizimu Afrika esanqobe izindondo ezinhlanu kuphela kuma-Olympic kuze kube manje, besekubhekwe ukuthi okungenani ibuye nenye indondo kwi-marathon yangoMgqibelo, lapho bekubhekwe khona uStephen Mokoka no-Elroy Grant.
UGrant uphume endaweni ka-11 ngesikhathi esingu-2:09:07, uMokoka waqeda endaweni ka-27 ngesikhathi esingu-2:10:59.
UMokoka ongumakadebona emijahweni yamabanga amade ubebhekwe kakhulu ekwenzeni kahle kwi-marathon yakulo nyaka ngenxa yamava akhe kwazise bese kungokwesithathu egijima kuma-Olympic kusukela ngo-2016, eRio de Janeiro, eBrazil, nango-2021, eTokyo, eJapan.
Njengamanje iNingizimu Afrika amathemba ayo isiwabeke kuGerda Steyn, uCian Oldknow no-Irvette van Zyl kwi-marathon yabesifazane ebangeni lika-42km, ngoSonto ngo-8 ekuseni.
USteyn osenqobe iComrades Marathon neTwo Oceans Marathon iminyaka ilandelana ngo-2023 nakulo nyaka, usabhekene nenselelo yokukhipha amangwevu kuma-Olympic Games njengoba kwawango-2021 engalibonanga elidlalayo ephuma endaweni ka-15 ngesikhathi esingu-2:32:10.