Kugqame amaphutha amaProteas etalajwa yiJamaica
KUNGESIKHATHI iqembu lakuleli le-netball, iSpar Proteas, lidudulana neJamaica emdlalweni kaGroup C eNdebeni yoMhlaba eKapa Isithombe: NSA/TWITTER
LIHLULWE okokuqala iqembu lakuleli lesizwe le-netball eNdebeni yoMhlaba ebanjelwe eKapa ngesikhathi lithelwa phansi yiJamaica 67-49.
Kungenwe kulo mdlalo womabili la maqembu esephethe amaphuzu amane ngalinye ngemuva kokunqoba iWales neSri Lanka emidlalweni yawo yokuqala kuGroup C.
Kucace zibekwa ukuthi amaProteas azobhekana nenselelo ehlukile kunemidlalo emibili yokuqala njengoba iJamaica ibilidlala ngokushesha ibhola iliphakele uJhaniele Fowler obengalibheki ipali.
Nokho iNingizimu Afrika igcine isingenile emdlalweni, ilekelelwa wumsindo wabalandeli abebeyigcwalise phama inkundla. Ibhola beselifika kumgadli wakuleli, uLenize Potgieter.
Kuphele ikota yokuqala iJamaica ihamba phambili ngo 16-12.
Izivakashi zibuye sezivutha kwikota yesibili zavula igebe lamaphuzu lamagoli ayisishiyagalombili.
Nokho amaProteas akwazile ukuphinde alinciphise ngemuva kokuthi kufakwe uNichole Taljaard endaweni ka-Elmere van der Berg, ofake amabhola amane kwayisishiyagalombili awazamile.
Kuyiwe ekhefini iSunshine Girls isihamba phambili ngo 32-26.
Kwikota yesithathu kugqame amaphutha eqenjini lasekhaya selilahla amabhola, bezicoshela kalula oShamera Sterling benoJodi-Ann Ward, abebeyibambe emuva kwiJamaica.
Kule kota amaProteas afake amagoli amathathu kuphela, izivakashi zahlohla angu-20, nokwenze yaphela sezihamba phambili ngo 52-29.
Umqeqeshi welakuleli, uNorma Plummer, uphinde wenza ushintsho, efaka u-Ine Mari Venter endaweni kaPotgieter, obesekhombisa ukukhathala.
Lolu shintsho lwenze umehluko njengoba uVenter efike wafaka umfutho phambili, esebambisene noTaljaard.
Kule kota yokugcina iqembu lakuleli lishaye amagoli angu-20, iJamaica yashaya angu-15 kodwa iJamaica yawuthatha umdlalo ngo 67-49.
Yize iqembu lakuleli lihluliwe kulo mdlalo kodwa lisazodlulela esigabeni sesibili samaqoqo lihambisana nayo iJamaica kanye neWales.
Kuleli qoqo elisha, uGroup G, lizohlangana namaqembu amathathu aqhamuka kuGroup D, okuyiNew Zealand, Uganda neTrinidad and Tobago.