Zinyukile izibalo zokuthengwa kwezimoto ezintsha ngo-2025
Kwa-Volkswagen Group, ehlanganisa ne-Audi, babuyele endaweni yesibili ngokudayisa kakhulu izimoto ezintsha ngoDisemba nyakenye njengoba kuthengwe ezingu-5 014
Image: Sithunyelwe
ZIHLEKA zodwa izinkampani zezimoto njengoba u-2025 ube muhle kuzo ngokudayisa kwazise izibalo zibe phezulu ngendlela eyagcinwa ngaphambi kokubhebhetheka kwegciwane iCovid-19.
Ngokwezibalo ezishicilelwe yi-naamsa, kudayiswe izimoto ezintsha ezingu-596 818. Yisibalo esinyuke ngo-15.7% uma kuqhathaniswa no-2024 lapho kwadayiswa ezingu-515 976.
Ezinyangeni zokugcina ku-2025 izibalo zokudayisa bezilokhu ziphezulu uma kuqhathaniswa nesikhathi esifanayo ngo-2024.
NgoDisemba kudayiswe izimoto ezintsha ezingu-48 983. Yisibalo esinyuke ngo-7 882 uma kuqhathaniswa no-41 101 owadayiswa ngoDisemba ku-2024.
Isibalo sezimoto ezidayiswe ngaphandle sehle ngo-10.4% uma kuqhathaniswa noDisemba ku-2024.
Kuhambe ezingu-26 852 ekubeni ngenyanga efayo ngo-2024 kwakuphume ezingu-29 955.
IToyota South Africa Motors isonge u-2025 ingakaze igudluzwe esicongweni sezinkampani ezidayisa kakhulu izimoto ezintsha zinyanga zonke
Image: Sithunyelwe
I-naamsa ithe ukunyuka kwezibalo zokuthengwa kwezimoto kusizwe wukwehla kwenzalo yemalimboleko kusuka ngoSepthemba ku-2024, ukulethwa kwezimoto ezibiza kangcono, ukunganyuki kakhulu kwentengo yezimoto nemali etholakale nogkukhishwa ebhodweni lempesheni.
Ithe amakhasimende athathe isinqumo sokungathengi phakathi kuka-2021 no-2024 avele angenisa emakethe efuna ukushintsha izimoto zawo.
Abanye abathengi bangenise ezimotweni ezihamba ngobuchwepheshe besimanje futhi ezivikela imvelo amaNew Energy Vehicle. Kushaye uNovemba izibalo zokuthengwa kwawo sezidlula ezonyaka wonke u-2024.
I-naamsa ithe ukufika kwezimoto ezibiza kangcono zaseChina nase-India kusizile kodwa kwaphonsela inselelo izinkampani ezikhiqiza kuleli.
Izibalo zezimoto ezidayiswe ngaphandle zidlule u-400 000 okokuqala ngqa.
Kuhambe ezingu-408 244 nokuyisibalo esinyuke ngo-4.4% uma kuqhathaniswa no-391 129 owadayiswa ngo-2024.
I-naamsa ithe no-2026 kubhekwe ukuthi kube womunye unyaka omuhle ngenxa yenzalo yemalimboleko ephansi nokunganyuki kakhulu kwentengo yezimoto ezintsha.
Ithe izibalo zinganyuka ngo-9% kuya ku-11% kwezango-2025.
I-naamsa isanda kushintsha ubuholi bayo. Umengameli sekunguPeter van Binsbergen oyisikhulu sakwaBMW Group South Afrika. Ungene esikhaleni sikaBilly Tom ophethe i-Isuzu Motors South Africa.
Amaphini yisikhulu sakwaToyota South Africa Motors u-Andrew Kirby, uThato Magasa ophethe iMitsubishi Motors South Africa noJan Aichinger ophethe kwaMAN Automotive South Africa.
Nazi izinkampani ezingu-15 ezidayise kakhulu ngoDisemba:
Toyota – 12 933
VW Group SA – 5 014
Suzuki Auto – 4 961
Hyundai Automotive South Africa – 3 068
Ford Motor Company – 2 987
GWM SA – 2 453
Chery Auto South Africa – 2 249
Isuzu Motors South Africa – 1 906
Kia South Africa – 1 508
Jetour South Africa – 1 371
Omoda and Jaecoo South Africa – 1 317
Renault – 1 304
Mahindra – 1 234
Nissan – 1 011
BMW Group - 843