Zizokwanda izindawo zokushaja izimoto zikagesi kuleli
I-BYD izibophezele ngokwandisa izindawo zokushaja kuleli
Image: Sithunyelwe
ZIZOKWANDA izindawo zomphakathi zokushaja izimoto ezihamba ngogesi eNingizimu Afrika kulandela isimemezelo sokuthi inkampani ezakhayo, iBYD, izozifaka ngonyaka ozayo.
I-BYD, igama layo langempela yiBuild Your Dreams, idayisa izimoto ezahlukene zikagesi kuleli okubalwa kuzo eyakamuva iSurf okuyiyona eshibhe kunazo zonke.
Le nkampani izibophezele ngokufaka izindawo zomphakathi zokushaja eziphakathi kuka-200 no-300 ezweni ngo-2026.
UStella Li oyi-Executive Vice President yakwaBYD uthe bahlela nokufaka izindawo zokushaja ezisheshayo ezingu-1MW uma sebethule izimoto ezikuvumelayo ukusetshenziswa kuzo.
Uthe konke lokhu kuqinisekisa ukuzibophezela kwabo ekwakheni isimo esivumela ukuthengwa kwezimoto ezihamba ngobuchwepheshe besimanje ama-new energy vehicles (NEVs).
UNomonde Kweyi ongumqondisi wezokumaketha kwaBYD South Africa uthe ubukhona beBYD eNingizimu Afrika buveza ukuzibophezela kwabo ekubeni okungaphezu kwenkampani yezimoto kodwa eyezobuchwepheshe eletha isisombululo emakethe.