Imvula yasehlobo iza nobungozi kubashayeli

IQALILE imvula yasehlobo ngempelasonto nokungadala izingqinamba ezahlukene kubashayeli emigwaqweni yaseNingizimu Afrika.

Ngokusho kwesikhulu seMasterDrive, u-Eugene Herbert, lokhu kungenza abashayeli bengagcini ngokubhekana nemigwaqo emanzi futhi eshelelayo kuphela kodwa nokuphakama kwerabha namafutha okunamathele emgwaqweni ngesikhathi sasebusika.

Uthe lokhu kwenza imigwaqo ishelele kakhulu futhi kube yingozi ukuhamba kuyo.

“Okubaluleke kakhulu wukwehlisa kahle ijubane lakho. Ungabhreki mawala futhi isigubhukane. Izandla zombili azihlale esiteringini. Buka lapho oya khona futhi isiteringi uzosijikisa lapho obheke khona. Ngakho, uma kunesihlahla phambi kwakho, ungasibuki isihlahla, kungcono ubheke lapho ufuna ukuba khona,” kusho uHerbert.

Uthe bheka ama-wiper ngaphambi kokuthatha indlela ukuhlola ukuthi awaguganga yini ebusika.

Ukhiphe nanka amanye amathiphu:

• Zinike isikhathi esanele sokuhamba ukuze ungagijimi isimo sezulu sibheda.
• Hamba ngesivinini esifanele isimo kodwa unganciphisi ijubane kungenasidingo ngoba lokhu kungaba yingozi.
• Ungayisebenzisi i-cruise control.
• Khanyisa amalambu.
• Bhreka kusanesikhathi ngokucophelela.
• Gwema amanzi amile emgwaqweni.
• Uma ungakwazi ukuwagwema, shayela uhamba kancane ukwenzela uma kunokucashile noma umgodi.
• Shiya igebe elanele phakathi kwakho nemoto oyilandelayo.
• Ukushayela budedengu nesivinini esiphezulu kunyusa amathuba okuthi imoto iphaphalaze ngenxa yamanzi.
• Uma uphaphalaza, susa kancane unyawo emafutheni kodwa ungabhreki mawala noma ujikise kakhulu isiteringi.
• Bheka izindlela zokuyoqeqeshelwa ukushayela kwi-skid pan ufunde ukuthi wenza njani uma uhluleka wukulawula imoto izulu lina.