Iphuza kancane kuphethroli iChery Tiggo Cross CSH

IMOTO: CHERY TIGGO CROSS CSH

ICHERY Tiggo 4 Pro isiphenduke isithandwa sabashayeli eNingizimu Afrika kangangokuba isingenye yamaSport Utility Vehicle (SUV) athengwa kakhulu.

Empeleni ngokwezibalo ezihlanganiswe yi-IOL, ngohhafu wokuqala wonyaka phakathi kukaJanuwari noJulayi kudayiswe amaTiggo 4 Pro angu-7 297. Lokhu kuyenza ibe sendaweni yesibili kumaSUV athengwa kakhulu ngemuva kweToyota Corolla Cross ezihola phambili ngo-9 576.

Kuningi okwenza iTiggo 4 Pro ihehe okunye kwako okuyintengo eqala kuR269 900. Kwezinye izinkampani ngaleyo mali uthola imoto encane.

Naphezu kokuthi iyathandwa kodwa esinye isikhalo ebesivela wukomela kwayo uphethroli.

Yinto abayilungisile ngokwethula eyi-hybrid iTiggo Cross CSH (Chery Super Hybrid). Iyalingana neTiggo 4 Pro engena ngaphezu kwayo kodwa yona ithe thuthu kancane ngezinga.

Ibhekana ngqo nezimoto ongabala kuzo iVW T-Cross ngokombango wabathengi kodwa kwiT-Cross ayikho eyi-hybrid.

ITiggo Cross yehluke ngendlela ebukeka ngayo ngaphandle kwiTiggo 4 Pro.

Ishaya ngamalambu angamaLED azikhanyisayo uma kuba mnyama nama-daytime running lights nawo angamaLED abheke ezansi. I-grille inkulu yase iphicwa nge-chrome.

Nangemuva amalambu angamaLED futhi ahlangene.

Uma ungena ngaphakathi inezihlalo zesikhumba esomshayeli esihlelwa ngogesi. Okudonsa amehlo kodwa yi-touchscreen infotainment system ehlangene ne-digital instrument cluster kokubili okungu-10.25 inch.

Kwesaphakathi nendawo udlala umsakazo, uxhuma iselula nge-Apple CarPlay futhi ubona nengaphandle uma upaka.

Ezansi kwaso kunesinye sokusetha i-aircon. Kumele uhlale nendwangu emotweni ngoba siyangcola futhi akufihleki uma kungcolile kwazise kuyacwebezela kusuka kuso wehle njalo udlule egiyeni ubheke ngasendaweni yokuphumuza ingalo.

Uma uthi nhla okhakhayini kune-sunroof encane phezulu.

Ngokwesikhala sikahle, nangemuva ngibone kuhlaleka.

Ngaphambili kunezindawo zokubeka iziphuzo. Esicabheni isigubhu sami samanzi engingahlukani naso esingu-1.5l besingena kanzima.

Ngaphansi kwegiya kunesinye futhi isikhala nendawo yokushaja iselula ngaphandle kwentambo. Yilapho futhi kufihlwe khona nezindawo zokushaja nge-USB okuba nzima ukufinyelela khona uma usesihlalweni somshayeli.

Nangemuva ikhona imbobo eyodwa yokushaja.

Ebhuthini sikahle noma sibuye sithathwe yibhethri le-hybrid system kancane. Okuhle kodwa wukuthi uyakwazi ukulalisa izihlalo ukwandisa isikhala.

Ukubaluleka kwale-hybrid system ukubona endleleni edla ngayo uphethroli. Ihambe idla amalitha angu-5.2 ngo-100km nokuyinto enhle kakhulu ngoba engeyona i-hybrid idla ngaphezu kuka-7l/100km.

Ngeke ulokhu uvakashela egaraji kwazise ungahamba amakhilomitha acela ku-1 000 uma ithangi ligcwele.

Injini yayo ongu-1.5 litre kaphethroli ekhipha amandla angu-150 kW ne-torque engu-310 Nm uma isihlangene nekagesi.

Uma usuka ihamba kahle buthule okuthi uma isivinini sinyuka ivele ikuthuse idumele phezulu kungazelele muntu ibange umsindo.

Umsindo iwubanga noma uyifaka ku-sport lapho ovele uyizwe sengathi ifuna ukungena ejubaneni.

Isiteringi ngendlela esithambe ngayo uma kukhona okukuphazamisayo ungazithola uphuma emgwaqweni. Senza kube lula kodwa uma upaka.

Ngasohlangothini lwezokuphepha abayincishanga iyanyinyitheka nokuyenza izishiye kude izimbangi. Ine-adaptive cruise control, iyasho uma kunemoto eseceleni ngesikhathi uvula isicabha, iyabika uma uzoshayisa, iyakutshela uma uphuma emzileni nokunye.

Intengo yayo ingaphansi kancane kweyeCorolla Cross hybrid nokungenza abanye babheke ngakuyo. Igama leCorolla kodwa linamandla nokungaba wumqansa ukwenza abathengi baphume kulo.

Intengo:

Tiggo Cross HEV Elite - R469,900

Ifika ne-warranty yeminyaka emihlanu noma u-150 000km, eyebhethri yeminyaka engu-10 yomnikazi wokuqala ne-service plan yeminyaka emihlanu noma u-60 000km.