Kugxekwa ukulolwa kwezembe kubasebenzi bakwaFord

ZIBHODLA umlilo izinyunyana zabasebenzi ngokuqhubeka kokudilizwa kwabasebenzi embonini yezimoto kuleli.

Eyakamuva yiFord Motor Company of Southern Africa esiqale uhlelo lokudiliza abasebenzi abalinganiselwa ku-500.

INational Union of Metalworkers of South Africa (Numsa) igxeke lokhu yathi kuwukuhlaselwa kwabasebenzi.

Ithe balinganiselwa ku-474 abazophelelwa wumsebenzi efemini yale nkampani eseSilverton ePitoli, eyezinjini eseGqeberha, abasebenza emahhovisi nabasebenzi abayitoho izinkontileka zabo ezizophela ngoDisemba.

Ifemu yaseSilverton yakha amaFord Ranger adayiswa kuleli nasemazweni angaphezu kuka-100 emhlabeni jikelele.

Ngo-2021, inkampani yamemezela ukuthi izotshala u-R15.8 billion ukuthuthukisa ifemu ukuze izokhiqiza le veni eqale ukuyithumela emazweni omhlaba ngo-2023. Ifemu ikwazi ukukhiqiza izimoto ezingu-200 000 ngonyaka.

Iphinde yatshala u-R600 million efemini yezinjini njengoba zakhiwa khona okubalwa nengu-3.0L V6 kadizili kanjalo nezingu-2.0L Single Turbo ne-2.0L Bi-Turbo.

Ngaleso sikhathi yathi ukunyuka komthamo wamaRanger akhiwayo kudale namathuba amasha omsebenzi angu-1 200 nokwenza abasebenzi bale nkampani babe ngu-5 500.

Okhulumela iFord, uDudu Nxele, ucashunwe kwi-IOL ethi benza izinguquko ezifanele eSilverton Assembly Plant naseStruandale Engine Plant.

“Sibuhlungu ngokuthi lezi zinguquko ezibalulekile efemini zizokwenza kunciphe izikhala kulezi zindawo zombili. Siyawuqonda umthelela lokhu enakho kubasebenzi bethu futhi sizibophezele ngokweseka abathintekayo,” kusho uNxele.

ISouth African Federation of Trade Unions (Saftu) ithe iyayeseka iNumsa ngokugxeka ukudilizwa kwabasebenzi.

“Lokhu kudilizwa kwabasebenzi okuhlelwayo kuwukuhlasela abasebenzi, imindeni yabo nekusasa lezimboni eNingizimu Afrika. Kulandela eduze ukulahleka kwemisebenzi efemini yakwaMercedes-Benz ese-East London, okukhombisa ukushuba kokuphela kwemisebenzi embonini yezimoto neyokukhiqiza,” kusho iSaftu.

Ithe kumele kube nengqungquthela ehlanganisa izinyunyana, uhulumeni, abakhiqizi bezimoto, abenza amaphathi nabathintekayo ukuze kuzomiswa ukuphela kwemisebenzi, kubhekwe uxhaso izinkampani eziluthola kuhulumeni futhi kwakhiwe ubudlelwano nabahlukene ukuze kuzoncipha ukuthembela ekudayiseni imikhiqizo ezweni elilodwa.