Kutholwe izinkinga okumele ziyolungiswa kwiBMW X3, VW Polo nezinye

ABANIKAZI bamaVW Polo, BMW X3, Ford Mustang, Ford Transit Custom namabhasi akwaHino kuzomele bavakashele amagaraji ukuze kuyolungiswa izinkinga esezitholakale kuzo, ngokweNational Consumer Commission (NCC).

I-Volkswagen South Africa ithe amaPolo anenkinga ngakhiwe phakathi kukaMeyi 19 noMeyi 23, nonyaka. Kuthiwa i-axle ngemuva ayifaswanga ngamandla afanele nokungenza ukuthi iphume. Uma iphuma imoto ingaphaphalaza.

Ohlangothini lweBMW X3, okuyiyo ephethe isicoco se-2025 SA Car of the Year, kuthokakale ukuthi kunenkinga kuma-head restraints ezihlalweni zangemuva angakhekanga kahle. Uma kunengozi kungenzeka engabesenzi kahle abagibeli balimale kanzima.

IFord Motor Company esanda kumemezela ukuthi izolungisa inqwaba yezimoto ezahlukene zamakhasimende, ithe amaFord Mustang esithole inkinga kuwo ngadayiswe phakathi kuka-2021 no-2022. Kuthiwa inenkinga kwi-fuel pump engasebenzi kahle nokungenza ukuthi uphethroli ungangeni kahle enjinini. Lokhu kungenza imoto icishe futhi uma kwenzeka ohamba kungaba nobungozi.

IFord iqhube yathi icela amaFord Transit Custom adayiswe phakathi kuka-2024 no-2025, ngenxa yenkinga ye-airbag. I-airbag yangasohlangothini lomgibeli kumele ishintshwe ngenxa yokuthi i-filter ingavimba i-gas uma kunengozi edinga kuphume i-airbag. Ingayivala ukuthi i-gas ingangeni lapho i-airbag okumele ifutheke khona.

I-NCC ithe amabhasi akwaHino ama-500 series kunenkinga kwi-steering system. Inkinga ingadala ukuthi singalawuleki ibhasi lihamba. Amabhasi athintekayo ngadayiswe phakathi kukaJulayi 5 2018 no-12 Agasti 2025.

Ithe amakhasimende kumele ahambise izimoto emagaraji ziyolungiswa mahhala.