Ube muhle uJulayi kubadayisi bezimoto ezintsha

UJulayi ube yinyanga enhle kubadayisi bezimoto njengoba izibalo zibe phezulu ngendlela eyagcina ukubonakala ngo-Okthoba 2019.

Ngokwe-naamsa, zibe ngu-51 383 izimoto ezintsha ezidayise eNingizimu Afrika ngo-Julayi. Lesi yisibalo esinyuke ngo-6 931 noma u-15.6% uma kuqhathaniswa no-44 452 owadayiswa ngoJulayi 2024.

Ithe lokhu kenziwa wukuvuma kwemigomo yokuboleka njengoba kwehle inzalo yemalimboleko.

Kuzo zonke izimoto ezingu-51 383 ezidayisiwe, ezilinganiselwa ku-42 700 noma u-83.1% zidayiswe emagaraji, ezilinganiselwa ku-11.1% zithengwe yizinkampani eziqashisa ngezimoto, u-3.1% uthengwe wuhulumeni kuthi u-2.7% kwaba ngowazo izinkampani.

Izimoto ezincane ezidayisiwe zibe ngu-36 248 nokuyisibalo esiphezulu senyanga kusuka ngoJanuwari 2017. Yisibalo esinyuke ngo-6 071 noma u-20.1% uma kuqhathaniswa no-30 176 owadayiswa ngoJulayi nyakenye.

Amaveni, amatekisi nezimoto ezincane zokusebenza kuthengwe ezingu-12 356 okuyisibalo esinyuke ngo-800 uma kuqhathaniswa nesikhathi esifanayo ngonyaka odlule.

Amaloli aphakathi nendawo ngobukhulu adayisiwe abe ngu-703 kuthi amakhulu namabhasi kwaba ngu-2 076.

I-naamsa ithe izimoto ezikhiqizwe kuleli zase zidayiswa ngaphandle zibe ngu-35 379. Yisibalo esehle ngo-677 noma u-1.9% uma kuqhathaniswa no-36 056 owadayiswa ngoJulayi nyakenye.

IToyota iqhubekile nokukhonya njengoba idayise izimoto ezingu-12 694. Okuyiyona edayise kakhulu kube yiveni iHilux okuthengwe angu- 3 120.