UBavuma uhole amaProteas eqeda ishobolo leminyaka enganqobi e-India

Ukaputeni wamaProteas, uTemba Bavuma, uhole iNingizimu Afrika iqeda ishobolo leminyaka engu-15 ingawunqobi umdlalo weTest e-India iphumelela ngama-run angu-30 e-Eden Gardens, eKolkata.

AmaProteas agcina ngoFebhuwari ka-2010 ukushaya i-India ekhaya emdlalweni weTest, esaholwa nguGraeme Smith.

Kulo mdlalo bekunzima ukubhetha njengoba womabili amaqembu ethwale kanzima ngenxa yokuthi inkundla ibivuna abashwibi.

AmaProteas akhishwe eshaye ama-run angu-159 kwi-inning yokuqala ngemuva kokuwina ithosi, akhetha ukubhetha kuqala. Umdlali ohambe phambili  kube ngu-Aiden Markram, oshaye angu-31.

Kubashwibi base-India bekubhoke uJasprit Bumrah othathe amawikhethi amahlanu.

I-India iphendule ngama-run angu-189, iholwa uKL Rahul oshaye angu-39. Umshwibi wamaProteas uSimon Harmer uthathe amawikhethi  amane.

Kwi-inning yesibili, amaProteas akhishwe onke eshaye ama run angu-153 lapho uBavuma eshaye khona angu-55, wasala yedwa engakhishiwe. Uyena yedwa ofinyelele kuma-run angu-50 kulo mdlalo.

I-India ibisidinga  ama-run angu-124 ukuze inqobe, yahluleka ukuwahlanganisa njengoba ikhishwe yonke inangu-93. Kuphinde kwagqama uHarmer ngokuthatha amanye amawikhethi amane, waze waqokwa njengomdlali ovelel.

UBavuma uthe bebelindele ukuthi kuzoba nzima ukubhetha kulenkundla waphinde wancoma abashwibi ngokugcina amaProteas emdlalweni ngemumva kokuba beshaye ama-amancane.

 "Besazi ukuthi kuzoba nzima ukubhetha kodwa bekumele sibhekane nalokho. Abashwibi bethu badlale kahle kakhulu, okwenze saba nenkolelo yokuthi sisengawunqoba umdlalo," kusho uBavuma, osedlale imidlalo engu-11 njengokaputeni we-Test engahlulwa.

 AmaProteas asezobheka ukunqoba umdlalo wokugcina kulolu chungechunge ozoqala ngoMgqibelo eBarsapara Stadium, eGuwahati.