UNabi uncoma umgadli obegxekwa abalandeli
UMGADLI weKaizer Chiefs, uFlavio Silva, oshaye igoli lakhe lokuqala kuleli qembu nokubeyilona elinqobe ngalo kwiLamontville Golden Arrows eMoses Mabhida Stadium, eThekwini, ngoMgqibelo Isithombe: BACKPAGEPIX
Image: Isithombe: BACKPAGEPIX
UMQEQESHI weKaizer Chiefs, uNasreddine Nabi, uncome ukuphikelela nokuzinikela komgadli omusha, uFlavio Silva, obegxekwa ngabalandeli ngaphambi kokuqala kweBetway Premiership.
USilva (26) ojoyine iChiefs ngaphambi kokuqala kwale sizini esuka kwiPersebaya yase-Indonesia, ushayele leli qembu igoli lokunqoba liguqisa iLamontville Golden Arrows ngo 1-0 emdlalweni wePremiership eMoses Mabhida Stadium, ngoMgqibelo.
Lo mdlali odabuka eGuinea-Bissau, ubeqala ukudlalela Amakhosi kowe-Arrows angene kuwona esuka ebhentshini.
“USilva kusukela ekuqaleni efika, uthole ukwesekwa okukhulu kusukela ethimbeni labaqeqeshi kuya kubadlali. Kuqale kwaba nenkinga yamaphepha akhe amgunyaza ukusebenza lapha eNingizimu Afrika nokuyikho okubambezele ukuqala kwakhe ukudlala eqenjini.
Ngenkathi esekulungele ukudlala, kube sekuba yithuba lokuthi azethule (kubalandeli), nokwenze kwabalula kuyena ngokuthi ashaye igoli ngomdlalo wakhe wokuqala.
Ngijabule ngaye ngokuthi ukwazile ukusiza iqembu kulo mdlalo, nengethemba ukuthi leli goli lizosiza ukwenyusa izinga lokuzethemba kuyena ngokuqhubeka kwemidlalo kule sizini,” kusho uNabi.
UNabi usho kanjena nje ngaphambi kokuqala kwale sizini ngenkathi Amakhosi edlala imidlalo yobungani eNetherlands ukulungiselela ukuqala kwesizini, kusabalale ezinkundleni zokuxhumana abanye babalandeli belibeka ngembaba elokuthi leli qembu lenze iphutha ngokusayinisa omunye umgadli ongekho ezingeni njengoba kwenzekile kumasizini edlule. Lokhu kwenzeke ngemuva kokusabalala kwe-video yalo mgadli egeja oqekelele bamathuba.
USilva ungomunye wabadlali abasayiniswe ngaMakhosi kule sizini ngenhloso yokuqinisa isikwati sawo ikakhulukazi njengoba ezobe ebambe iqhaza nasemqhudelwaneni weCaf Confederation Cup.
Phakathi kwabo kubalwa uPaseko Mako, Thabiso Monyane, Ethan Chislett, Siphesihle Ndlovu, Nkanyiso Shinga, ukubala abambalwa.
Amakhosi asayiqale ngonyawo oluhle le sizini, asenqobe imidlalo emine kweyisihlanu yePremiership, adlala ngokulingana kowodwa. Asendaweni yesibili kwi-log yePremiership kodwa ayalingana ngamaphuzu neSekhukhune United esaqhwakele ngamaphuzu angu-13.
“Ngisahlabeke umxhwele ngendlela abanye abadlali bethu abasayibambe ngayo kodwa ukwakha iqembu kuhlale kunzima ngabadlali abasha abasadinga isikhathi sokuzinza nokwenza kangcono.
Ngicabanga ukuthi esesikudinga manje yisikhathi nomfutho wabadlali njengoba ngisho uma uletha abanye abadlali eqenjini udinga isikhathi sokuthi ubafake kule ndlela ofuna badlale ngayo,"kusho uNabi.
Ngemuva kwekhefu leFifa, Amakhosi azobuyela ensimini ukuzobhekana neSekhukhune ngoSepthemba 16, eFNB Stadium, eNasrec.