UGlenrose uhoxile kuma-World Championships
UGLENROSE Xaba emukela umklomelo wakhe kwabakwaHollywoodbets nakumengameli weKZN Athletics, uSteve Mkasi, ngemuva kokudla umhlanganiso kwabesifazane kwiHollywoodbets Durban 10km
Image: HOLLYWOODBETS
UMSUBATHI uGlenrose Xaba odle umhlanganiso emjahweni iHollywoodbets Durban 10km uveze ukuthi uhoxile kwi-World Athletics Championships eTokyo, eJapan, phezu kokuzibekisela indawo kulo mqhudelwano ozoba goSepthemba 12 kuya ku-21.
UXaba (30) ovutha engabaselwe emijahweni yebanga lika-10km kulo nyaka, nguyena owinile kwabesifazane koweHollywoodbets Durban 10K ngoMgqibelo eKingsmead, eThekwini, ngesikhathi esingu-27:58, wakhala wemuka nesheke lika-R37 500. Endaweni yesibili kungene uNeheng Khatala waseLesotho ngesikhathi esingu-31:53, isithathu kwaba uFridah Ndinda waseKenya ngo-32:25.
Kwabesilisa odle umhlanganiso nguKamohelo Mofolo waseLesotho ngesikhathi esingu-27:58 naye wakhala wemuka nesamba sika-R37 500. Isibili kube nguKabelo Mulaudzi ngesikhathi esingu-28:17, kwathi endaweni yesithathu kwangena uThabang Mosiako ngo-28:25.
UXaba owaphula irekhodi likazwelonke kwabesifazane emjahweni iCape Town Marathon yebanga lika-42.2km ngo-Okthoba nyakenye eshaya isikhathi sika-2:22:2, bekulindeleke ayoyibamba okokuqala kwi-World Championships kulo nyaka.
Nokho, uveze ukuthi ngemuva kokuxoxa nemenenja yakhe uLee-Roy Newton nethimba lakhe labaqeqeshi eliholwa wuCaster Semenya, kuthathwe isinqumo sokuthi angayi kwi-World Championships.
“Imenenja yami ithe ngiseyingane kuma-marathon, ngakho akufanele ngijahe ukugxumela kuma-marathon ngisuka kwi-track ngokuyogijima kwi-World Championships.
Izinga liphezulu kakhulu laphaya (kwiWorld Championships), ngakho kudingeka ukuzilungiselela ngendlela eseqophelweni eliphezulu.
Yebo, ngikwazile ukuzibekisela indawo ukuyogijima khona kodwa akukho ezinhlelweni zami,” kusho uXaba, ekhuluma nabezindaba ngemuva komjaho ngoMgqibelo.
Yize engeke esaya eJapan, uXaba uvumile ukuthi ubengakujabulela ukuyobamba iqhaza emabangeni ka-5000m noma u-10 000m.
“Akubanga yisinqumo esilula. Ngajabula ngonyaka odlule ngizibekisela indawo kwi-World Championships, kodwa imenenja yami yathi angikaqini ngokwanele.” kusho yena.
UMofolo (19) uthe yize ebehlose ukwephula irekhodi lakhe laseLesotho lika-10km lesikhathi esingu-27:52 aliqophe eThekwini kwi-Absa Run Your City kodwa kumjabulisile ukunqoba lo mjaho weHollywoodbets abeqala ukuwugijima.
“Inhloso yami bekuwuzama ukwephula irekhodi lami lika-10km kodwa kwangenzeka njengoba bengihlosile. Nokho ngijabule kakhulu ngokuwina lo mjaho,” kusho uMofolo.
Umlenze wesibili okungowokugcina nonyaka weHollywoodbets 10km, uzoba seGoli ngoSepthemba 13