Iqhubekile nomgqigqo iSundowns Ladies evivela iChampions League

IMAMELODI Sundowns Ladies ibuyelwe yifomu ngesikhathi esifanele kwiSafa Hollywoodbets Super League njengoba sezidumela emasumpeni ngokuqala kweCaf Women’s Champions League ezobanjelwa kuleli ekupheleni kuka-Agasti. 

ISundowns iqhathwe kuGroup A weChampions League neNtopwa FC yaseMalawi, iBeauties FC yaseNamibia, neZesco Ndola Girls yaseZambia.

I-Women’s Champions League izobanjelwa e-AW Muller Stadium, eGoli, ngo-Agasti 22 kuya ku-31.

ISundowns ibuye namaphuzu amathathu ngeSonto ishayela ekhaya iDurban Ladies ngo 3-1 eSugar Ray Xulu Stadium, eClermont, yaqhubeka nokuhlala esicongweni se-log yeSuper League.

Inqoba kwiDurban nje, ngeledlule ishaye i-University of Pretoria ngo 2-0. Ukunqoba le midlalo emibili yakamuva kweSundowns Ladies, kusho ukubuyelwa yifomu kwazise leli qembu lasePitoli eliqeqeshwa uGodfrey Sapula, like lalahla amaphuzu imidlalo emithathu ilandelana ngaphambi kwekhefu le-Women’s Africa Cup of Nations (Wafcon). Ligingqelwa yiRoyal AM Ladies, lalandelwa yisibhaxu seJVW FC, labambana ngo 0-0 nezimbangi zayo, i-University of Western Cape (UWC). 

Abantwana Ba Style babuyelwa yifomu nje, izimbangi zabo i-UWC okungazihambeli kahle kule sizini, ziphinde zalahla amaphuzu ziguqiswa yi-University of Fort Hare ngo 2-0. 

Leli qembu laseKapa eliqeqeshwa nguThinasonke Mbuli lisendaweni ka-12 kwi-log yeSuper League emidlalweni engu-14 elisayidlalile, okuyindawo elingajwayele ukuba kuyona ngalesi sikhathi sesizini. 

I-TUT Football Club engagayelwa mphako kule sizini, iqhubekile nokukhombisa ukuba yiqembu eliyingozi elingabhincisela nxanye ompetha abavikela isicoco, iSundowns, ngokubhaxabula iRoyal AM ngo 5-2.

Leli qembu eliqeqeshwa nguChristina Kutumela lisendaweni yesibili kwi-log yeSuper League ngamaphuzu angu-34 emidlalweni engu-16, lihlukaniswe ngamane neSundowns esaqhwakele ngawu-38 emidlalweni engu-18.